
Çelîk ê piştî 30 salan hate berdan li Amedê bi coş hat pêşwazîkirin 

2025-06-09 15:44:41


	&nbsp;

	AMED - Mehmet Çelîk ku piştî 30 sal û 6 mehan ji hefsê hate berdan, li warê xwe Amedê bi dirûşma “Bijî berxwedana zindanan” hate pêşwazîkirin.”&nbsp;

	&nbsp;

	Mehmet Çelîk (50) ku li Girtîgeha Hejmar 1 a Kandirayê dihat ragirtin û piştî 30 sal û 6 mehan di 3’yê Hezîranê de hate berdan, li warê xwe Amedê bi coşeke mezin hat pêşwazîkirin. Çelîk, li Otogara Amedê ji hêla malbata xwe û nûnerên rêxistinên civaka sivîl û partiyên siyasî ve hate pêşwazîkirin. Çelîk ku bi berzkirina tililiyan û dirûşma “Bijî berxwedana zindanan” hate pêşwazîkirin, yek bi yek hemû kes silav kir.

	&nbsp;

	Çelîk, spasiya kesên ber wî ve hatin kir û got ku ji ber berdana xwe keyfxweş e. Çelîk, diyar kir ku li girtîgehan hêj gelek girtî hene. Çelîk, piştî axaftinê derbasî mala malbata xwe ya li navçeya Rezanê bû.&nbsp;

	&nbsp;

	DER HEQÊ MEHMET ÇELÎK DE

	&nbsp;

	Mehmet Çelîk, di sala 1994’an de li Mêrsînê hate binçavkirin û dadgehê bi îdiaya “Xerakirina yekitî û yekparetiya dewletê” cezayê muebbedê lê birî. Çelîk, li girtîgehên Konya, Burdur, Semsûr, Bolu, Îzmîr, Sêwereg û Rihayê hate ragirtin. Diviyabû Çelîk di Kanûna 2024’an de bihata berdan lê tehliyeya wî bi hinceta ku zexta “poşmantiyê” red kiriye, ji bo 6 mehan hate astengkirin.&nbsp;