
Nûnerên Mexmûrê piştî 37 rojan hatin berdan 

2025-06-22 15:17:10


	&nbsp;

	NAVENDA NÛÇEYAN - Nûnerên Kampa Mexmûrê ku 37 roj berê ji hêla Iraqê ve hatibûn binçavkirin, hatin berdan.&nbsp;

	&nbsp;

	Şandeya ku ji Hevserokê Meclisa Gel a Wargeha Penaberan ya Şehîd Rûstem Cûdî (Mexmûr) Ehmed Şehbaz, Hevşaredar Edban Yilmaz û Hevberdevkê Komîteya Têkiliyên Derve Bêwar Emîn pêk dihat, ji bo çareserkirina pirsgirêkên wargehê di 14’ê Gulanê de çûbûn serdana Bexdayê. Piştî endamên şandeyê bi Wezîrê Dadê re hevdîtin kir û vedigeriyan, hatibûn binçavkirin.&nbsp;

	&nbsp;

	Xelkê wargehê li dijî rêgirî, ambargo û dorpêçê gelek caran meşiyan û daxwaza mafê xwe kirin. Di encama berxwedana xelkê Mexmûrê de, nûnerên wargehê piştî 37 rojan hatin berdan.&nbsp;

	&nbsp;

	AMBARGO DIDOME&nbsp;

	&nbsp;

	Wargeha Mexmûrê piştî dorpêça PDK’ê, vê carê jî bi dorpêçeke Iraqê re rû bi rûye. Iraq ji 10’ê Nîsanê ve rê nade kel û pel bikevin nava wargehê, rê nade karker biçin ser karên xwe û nasnameyên xelkê wargehê nû nake. Herwiha, ambargoya PDK’ê ya li ser wargehê jî hîn dewam dike. Di 17 Tîrmeha 2019’an de rêveberiya PDK’ê ambargo danî ser wargehê û rê neda ku tu kes ji wargehê biçe Hewlêrê. Ji wê rojê ve PDK jî rê nade xelkê wargehê derbasî bajarên başûrê Kurdistanê bibe. Ev ambargo û rêgirî di dema dawî de bandorek xirab li jiyana xelkê wargehê dike û ev bandora nerênî roj bi roj zêdetir dibe.

	&nbsp;