
Civînên 'Aştî û Civaka Demokratîk' didomin   

2025-07-03 23:59:15


	&nbsp;

	NAVENDA NÛÇEYAN -Li Şirnex û Mêrdînê bi pêşengiya TJA, DBP û DEM Partiyê li ser banga "Aştî û Civaka Demokratîk" a Rêberê Gelê Kurd Abdullah Ocalan civîn hatin lidarxistin.

	&nbsp;

	Tevgera Jinên Azad (TJA), Partiya Herêmên Demokratik (DBP) û Partiya Wekhevî û Demokrasiyê ya Gelan (DEM Partî), tekildarî banga Aştî û Civaka Demokratîk a Rêberê Gelê Kurd Abdullah Ocalan li bajarên Bakurê Kurdistanê û Tirkiyeyê civînên gel da destpêkirin. Di çerçoveya civînan de li navçeyên Cizîr û Hezexê yên Şirnexê û Mêrdînê civînên gel a Aştî û Civaka Demokratîk hatin lidarxistin.

	&nbsp;

	CIZÎR

	&nbsp;

	Civîn li parqa Botaşê ya taxa Nûr a navçeya Cizîrê hat lidarxistin. Di civînê de pankarta, “Civînên Aştî û Civaka Demokratîk” hat daliqandin. Civîn ji bo cangoriyên azadî û demokrasiyê bi deqîqeyeke rêzgirtinê destpê kir.

	&nbsp;

	Piştî rêzgirtinê li ser pêvajoyê nivîs hat xwendin. Di nivîsa hat xwendin de hat destnîşankirin ku Rêberê Gelê Kurd Abdullah Ocalan dev jî ziman, erdnîgarî û nasnameya gelê Kurd bernedaye û girîngiya rêxistinbûyinê bi lêv kiriye û gotiyê divê dewlet pêşiya sazîbûyinê vebike û mafê gelê Kurd nas bike. Her wiha di nivîsê de nêrîna Abdullah Ocalan a ji bo Rojhilatê Kurdistanê jî wiha hat gotin: “Me çawa ku li Rojava gelê xwe parast ji Rojhilat jî rewşeke wisa biqewime dîsa em ê gelê xwe biparêzin.” Di nivîse de hat gotin ku Rêberê Gelê Kurd Abdullah Ocalan aniye ziman ku serdema nû avakirina Neteweya Demokratîk e û girîngiya komînbûnê destnîşan kiriye. Piştî xwendina nivîsê welatiyên pirsên meraq dikirin ji dîvanê pirsîn. Dîvanê jî pirsên welatiyan bersivand û civîn bi nirxandinên li ser pêvajoyê bi dawî bû.

	&nbsp;

	HEZEX

	&nbsp;

	Di çerçoveya civînan de li navçeya Hezexê jî bernameya Civînên Aştî û Civaka Demokratîk hat lidarxistin. Welatiyên tev li civînê bûn li ser pêvajoyê pirsên ku meraq dikirin ji dîwanê pirsîn. Dîwanê jî li ser pêvajoyê nirxandin kir û pirsên gel bersivand. Civîn bi pirs û bersivan bi dawî bû.

	&nbsp;

	MÊRDÎN

	&nbsp;

	Li Mêrdînê jî li navçeya Şemrex, Dêrik, Mehsertê, Stewrê, Nisêbîn û Midyadê hevdîtinên gel hatin lidarxistin.&nbsp;