Li Herêma Federal a Kurdistanê, 3  sal in qeyrana aborî heye. Ev jî  bandoreke neyînî li jiyan û rewşa gel dike. Ji ber qeyrana aborî gelek pirsgirîkên cuda li herêmê rû didin û heya niha jî tu hewledanek hikûmetê ya çareserkirina vê rewşê xuya nake. Her wiha nedayîn û derengketina mûçeyê karmandan jî li her qadên civakî bûye sedema pirsgirêkan. Îsal bixwe jî hikumeta herêmê ji sedî 21 mûçeyê karmendan kêm kiriye û heta niha tenê mûçeyên meha adarê daye. 

 

Ji ber nedayina mûçeyan û qrîza aborî, gelê herêmê rojên zor û zehmet derbas dike. Gelê herêmê têkçûyina aborî bi siyaseta PDK û hevkariya wê ya bi Tirkiyeyê re gire dide. Derbarê qrîza aborî û geşadanên siyasî de Şêwirmendê Berê yê Serokkomarê Iraqê Berhem Salih û siyasetmenderê kurd Salar Mehmûd ji Ajansa Mezopotamyayê (MA) re axivî. Mehmûd, diyar kir ku sedemê qrîza aborî nerêvebirina hikûmeta herêmê ye û got ku parlemento bikaribe hesab ji hikûmetê bipirse dê qrîz çareser bibe. 

 

‘DIVÊ PARLEMENTO HIKÛMETÊ BIXE BER LÊPIRSÎNÊ’

 

Mehmûd, destnîşan kir ku ji xeynî bandora şewba koronayê, polîtîkayên ku li herêmê tên meşandin jî bandoreke neyînî li aboriya gel dike û wiha got: “Sedema yekemîn a qeyrana aborî daketina nirxê neftê û şewba vîrûsa koronayê ye. Her wiha siyaseteke baş ku aboriyê bi rê ve bibe jî nîne. Peymana Herêma Kurdistanê ya neftê ya li gel Tirkiyeyê xesar daye gelê Kurdistanê. Divê yan ev peymanan di berçavan re bê derbaskirin an jî bê betalkirin. Gelê Kurdistanê ji Hikûmeta Herêma Kurdistanê nîgerane ku heya niha nikaribûye beşek ji qrîzên berê yên aborî çareser bike û mûçeyê karmendan bide. Pêwîstî bi reforman heye û divê zelalî di xerckirinê de çêbibe û parlemento hikûmetê bixe ber lêpirsînê ka çima nikare sozên ku daye bi cîh bîne.”

 

‘PÊWÎSTE MIJARA NEDAYINA MÛÇE NEBE BEŞEK ŞERÊ SIYASÎ’

 

Derbarê nerazîbûnên nedayîna mûçeyan de jî Mehmûd, bi lêv kir ku mafê herkesî heye k udi vê mijarê de rêveberiya herêmê şermezar bike û ev tişt anî ziman: “Karmendên hikûmetê çalakiyan li dar dixin û nerazîbûnên xwe tînin ziman. Ev mafê wan yê herî sereke ye. Gelê Kurd berdêleke mezin da ji bo ku bibe xwedî hikûmet. Erka parlementoyê ew e ku  li rex gel raweste û tenê nehêle. Pêwîste Iraq jî mûçeyê karmendan bişîne û mijara mûçe nebe beşek ji şerê siyasî yê di navbera Hikûmeta Herêma Kurdistanê û ya navendî de.”

 

‘PARLEMENTO BIKARIBE HESAB BIPIRSE WÊ ÇARESER BIBE’

 

Mehmûd, xwest ku Parlementoya Herêma Kurdistanê hesab ji hikûmeta herêmê bipirse û axaftina xwe wiha domand: “Heke reform were kirin, berpirsên ku gendelî kirine werin dadgehkirin, parlemento bikaribe hesab ji hikûmetê bipirse, dê beşek qeyran çareser bibin. Ji ber ku ev qeyran demeke dirêj e derketine, ji bo bên çareserkirin dem divê û bernameyek jêre pêwîste. Pêwîste hemû alî bi armanca parastina berjwendiyên gel beşdarî hikûmetê û xebatê bibin. Reformên rasteqîn bên kirin û di gotinê de nemînin, qeyranên aboriyê yên herêmê wê ber bi çareseriyê ve biçin.”

 

‘GELÊ KURD HÊJAYÎ JIYANEKE BAŞTIR E’

 

Mehmûd, axaftina xwe bi van gotinan bi dawî kir:” Hêvîdarim ku gelê kurd yekitiya xwe ava bike. Encax bi yekîtiyê wê planên dijmin têk biçin. Gelê kurd gelekî aştîxwaz û mirov dost e. Ji ber vê gelê kurd hêjayî jiyaneke baştir e. Gelê kurd li Rojhilata Navîn xwedî cihekî diyar e. Ji ber vê tu welat û hêz nikare vê rastiyê ji înkar bike.”

 

MA / Zeynep Dûrgût