ENQERE - Di Doza Kobanê de parêzer û siyasetmedaran daxwaza reda dadgerî veguhezandin dadgeha bilindtir lê daxwaz hat redkirin. 

 

Danişîna 3’yemîn a Doza Kobanê ku Hevserokên Giştî yên berê Selahattîn Demîrtaş û Fîgen Yuksekdag jî  di nav de derbarê 108 siyasetmedarên ji siyaseta kurd de hat vekirin, li 22’yemîn Dadgeha Cezayê Giran a Enqereyê ku li Kampûsa Girtîgeha Sîncanê ye dest pê kir. 

 

Hevserokên Giştî yên HDP’ê Pervîn Bûldan û Mîthat Sancar, parlamenter û rêveberên HDP’ê, serokên baroyan beşdarî danişînê bûn. Her wiha nûnerên ji Amerîkayê û Îngîlistanê, endamên Delegasyona Tirkiyê ya Yekîtiya Ewropayê û nûnerên Rêxistina Efûya Navnetewî jî dozê dişopînin. 

 

POLÎSAN DERDORA KAMPÛSÊ DORPÊÇ KIRIYE 

 

Li ber Kampûsa Girtîgehê maşîneyên zirxî û polîs hatin sekinandin. Gelek kesên ku derbasî eywana danişînê bûn di xala lêgerînê ya polîsan de derbas bû. 

 

SIYASETMEDAR BI SEGBÎS’Ê BEŞDARÎ DANIŞÎNÊ BÛN 

 

Hevserokên Giştî yên HDP’ê yên berê Selahattîn Demîrtaş û Fîgen Yuksekdag, Hevşaredara Amedê ya berê Gultan Kişanak, Hevseroka Giştî ya DBP’ê ya berê Emîne Ayna, Endamê RTÛK’ê yê HDP’ê Alî Urkut, Endamê Komîsyona Têkiliyên Derve ya HDP’ê Nazmî Gur, Hevşaredarê Qersê Ayhan Bîlgen ê qeyûm danîn şûna wî, Parlamentera HDP’ê ya berê Gulser Yildirim, endamên Desteya Rêveberiya Navenda HDP’ê Zeynep Olbeci, Cîhan Erdal, Can Memîş, Meryem Adibellî ji girtîgehên lê girtî ne bi rêya Pergala Deng û Dîmen (SEGBÎS) û Endamê Şandeya Îmraliyê û Parlamenterê HDP’ê yê berê Sirri Sureya Onder ê ne girtî tê darizandin jî bi SEGBÎS’ê beşdarî danişînê bûn. Parlamenterê HDP’ê yê berê Altan Tan û rêvebera HDP’ê ya berê Gulfer Akkaya jî mazeret nîşandan û beşdarî danişînê nebûn. 

 

Parlamentera HDP’ê ya berê û aktîvîsta TJA’yê Ayla Akat Ata, Hevseroka Giştî ya DBP’ê ya berê Sebahat Tuncel, Berdevkê HDP’ê yê berê Gunay Kubilay, parlementerên HDP’ê yên berê Emîne Beyza Ustun, Îbrahîm Bînîcî, Endamê MYK’a HDP’ê yê niha Alp Altinors, Hesabgirê HDP’ê yê berê Zekî Çelîk, endamên MYK’a HDP’ê yên berê Pervîn Oduncu, Ayşe Yagci, Bîrcan Yorulmaz, Berfîn Ozgul Kose, Bulent Parmaksiz, Îsmaîl Şengul, Dîlek Yagli û Sîbel Akdenîz jî li eywana danişînê amade ne. 

 

DAXWAZA REDA DADGERÎ HAT REDKIRIN 

 

Şandeya dadgehê ragihand ku daxwaza reda dadgerî ya parêzer û siaysetmedaran a ji bo dadgeha bilindtir a 23’yemîn Dadgeha Cezayê Giran a Enqereyê hatiye redkirin. 

 

Danişîn bi xwendin ewraqên li dosyeyê hatine zêdekirin û parastina siyasetmedaran berdewam dike.