Li Amedê, xizmên windayan û Şaxa Komeleya Mafê Mirovan (ÎHD) a Amedê, lêgerîna xwe ya edaletê di roja destpêkê ya sala 2022'yan de berdewam kirin. Di hefteya 673'yan de xizmên windayan û ÎHD'î li ber Birdariya Mafê Jiyanê ya Parqa Koşûyolû ya li navçeya Rezan a Amedê hatin gelhev û pirsa aqûbeta Komkujiya Dîgorê ku di 14'ê tebaxa 1993'yan de pêk hat û 6 jê zarok bi giştî 17 kesan têde jiyana xwe ji dest da pirsîn. 

 

 

KOMKUJIYA DÎGORÊ

 

Di çalakiyê de Endama Lijneya Birevebirinê ya Şaxa ÎHD'ê ya Amedê Derya Yildirim daxuyanî da û qala pevajoya berî û piştî koımkujiyê kir. Yildirim, da zanîn ku roja komkujiyê ji 20 gundan bi hezaran kes li dijî ferzkirina cerdevanî, ambargoya xurek û serdegirtina malan li gundê Kocakoy hatine gelhev û ber bi Dîgorê dest bi meşê kirine û wiha got: "Dema ku mabû 2 kîlometre girse bigihîje Dîgorê polisên tevgera taybet pêşiya wê birîn û bêyî hişyarkirin gule li girseyê reşandin. Di encama gulebarankirinê de 6 jê zarok bi giştî 17 kesan jiyana xwe ji dest dan."

 

Di dawiyê de jî Yildirim, destnîşan kir ku 8 polisên berpiryar hatine darizandin û daraza Tirkiyeyê wan beraet kiriye lê Dadgeha Mafê Mirovan a Ewropayê (DMME) ji ber komkujiyê Tirkiyeyê mehkûm kiriye. 

 

ELIH

 

Li Êlihê jî xizmên windayan û endamê Şaxa ÎHD'ê ya Êlihê, di hefteya 510'an a çalakiya xwe de li Kolana Gulistanê li ber Birdariya Mafê Mirovan li hev civiyan û pankarta "Bila winda bên dîtin û faîlên wan bên darizandin" vekirin. Di çalakiyê de wêneyên windayan hatin hilgirtin. Hevserokê Şaxa ÎHD'ê ya Êlihê Devran Yildiz axivî û aqûbeta Zeynel Kursep ku ji 24'ê adara 1994'an ve agahî jê nayê girtin pirsî. 

 

Piştî daxuyaniyê çalakiya rûniştinê ya ji bo 5 deqeyan hat lidarxistin û çalakî bi vê bi dawî bû.