AMED - Hevserokê Gîştî ya HDP’ê Pervîn Buldan tev li çalakiya Nobeta Edaletê ya malbatên girtiyan bû û wiha got: “Hemû kesên xwedî wijdan, bi rûmet û edaletxwaz bila piştgiriyê bidin dayikên me.”
Malbatên girtiyan, ji bo berdana girtiyên nexweş û girtiyên ku cezayê wan xelasbûyî û nayên berdan, li Amedê di 16’ê mijdara sala 2021'an de dest bi çalakiya Nobeta Edaletê kiribûn. Çalakiya malbatan îro jî berdewam kir. Çalakiya îro li pêşiya Saziya Tipa Edlî (ATK) a Amedê hate lidarxistin. Di çalakiyê de Hevseroka Giştî ya Partiya Demokratîk a Gelan (HDP) Pervîn Bûldan, Serokwekîla Koma HDP’ê Meral Daniş Beştaş, parlementera Êlihê û berdevkê Meclisa Jinan a HDP'ê Ayşe Acar Başaran, aktîvîstên Tevgera Jinên Azad (TJA), rêveberên jin ên Partiya Herêmên Demokratîk (DBP) û HDP’ê, Federasyona Komeleyên Piştevanî û Hiqûqê ya bi Malbatên Girtî Hikûmxwaran re (MED TUHAD-FED), Komeleya Piştevaniya bi Malbatên Girtî û Hikûmxwaran re (TUAY-DER) ya Amedê, Komeleya Yekitî û Çandê ya Piştevanî û Alîkariya Kesên li Dergûşa Şaristaniyê Xizmên Xwe Winda Kirine (MEBYA-DER), Komeleya Lêkolînên Ziman û Çandên Mezopotamyayê (MED-DER) û Saziya Hiquqnasên ji bo Azadiyê (OHD) û gelek endamên saziyên jinan amade bûn.
Di çalakiyê de dayika girtiyê nexweş Fevziye Kolakan diyar kir ku zextên li ser zarokên wan zêde bûne û wiha got: “Heya dilopeke xwînê di laşê me de hebe, em ê têkoşîna ji bo zarokên xwe bidomînin. Bila vê zilma ser zarokên me bi dawî bikin. Erdogan bila tenê mehekê zarokê xwe nebîne, neaxive, ka yê çi bike. Serokkomar Erdogan zarokê xwe dişîne derveyî welat û zarokên xelkê jî dide kuştin. Ev meheke min dengê lawê xwe jî ne bihîstiye. Ji bo kurê min bînin Amedê min heya niha gelek caran serlêdan kirin. Lê mixabin ev serlêdanên min hatin redkirin. Bavê wî jiyana xwe dest da lê nehêlan were şînê jî. Ev 28 sal in kurê min girtî ye. Çima zarokên me naberdin? Ev 30 sal in girtî ne ma dê ji vir û şûnde çawa poşman bibin? Banga me ji bo Wezareta Edaletê ew e ku mafên zarokên me bidin. Ne Bandirma lê kurê min bibin dûvê din ê dinyayê jî em ê dev ji berxwedana xwe bernedin.”
‘EM Ê DI DAXWAZA XWE DE BI ISRAR BIN’
Ji xizmên girtiyan Herdem Mervanî jî bi lêv kir ku wek malbat û xizmên girtiyan ev 6 meh in li nobeta edaletê digirin û wiha domand: “Heya niha çi daxwazên me nehatine qebûlkirin. Em wijdana civakê ne. Wezîrê Edaletê heya îro jî li aliyê daxwazên me de çi daxuyanî neda ye. Em tenê çareseriyê daxwaz dikin. Em ê israra xwe ya di daxwaza xwe de bidomînin. Herî dawî em dibêjin, bila girtiyên nexweş û înfazên wan hatine şewitandin werin berdan.”
‘JI BO PIŞTGIRIYÊ LI VIR IN’
Piştre jî Hevseroka Giştî ya HDP’ê Pervîn Buldan di çalakiyê de axivî û da zanîn ku dayikên girtiyan ev 6 meh in banga edaletê dikin. Buldan, bi domdarî got ku daxwaza dayikan bidawîkirina zextên li ser girtîgehan in û wiha pê de çû: “Ji b ovan daxwazan, dayikan serî hildan. Peywira me ew e ku em dengê dile dayikan bibihîzin û bidin bihîstin. Li girtîgehan binpêkirinên mafan pir zêde bûne. Her roj agahiya mirinan tên. Niha hezar û 600 girtiyên nexweş di girtîgehê de ne. Van girtiyan terkî mirinê dikin û nahêlin li derve bên dermankirin. Girtîgeh bûne ‘neynûka welat.’ Li cihekî ku binpêkirinên li girtîgehan zêde dibin û zilm li girtiyan tê kirin, malbat ji ber zarokên xwe bi dil tirs, mirov nikare qala edaletê bike.”
‘MALBATAN CEZA DIKIN’
Buldan, diyar kir ku girtiyan bi zanebûn sirgûnî deverên dûr dikin û axaftina xwe wiha bi dawî kir: “Bi vê rêbazê re jî malbatan ceza dikin. Bila baş bê zanîn ku heta demokrasî, azadî û aştî tî vî welatî di serî de çalakiya dayikên me dê têkoşîna heq û hiqûqê bidome. Em bibawer in ku dê rojekê edalet were vî welatî. Dê edalet bo wan kesên ku niha van neheqî û bêhiqûqiyan dikin jî hewce bike. Desthilatdarî dê heta hetayê li cihê xwe nemîne. Bila kes baweriya xwe nede wan kursiyan. Yên ku îro van neheqiyan dikin dê rojekî werin darizandin û hesabê bidin. Banga me ji bo gelên Tirkiyeyê ew e ku xwedî li dayikên me derkevin û bi tenê nehêlin. Banga me ji bo wezîrê edaletê jî ew e ku dawiyekî li van neheqî û binpêkirinan bînin û çareseriyekî pêş bixe.”
Çalakî bi dirûşma, “Heq, hiqûq edalet” bi dawî bû.