AMED - MEBYA-DER û TUHAY-DER'ê ji bo piştevaniya bi malbatan re li navçeya Bimsilê bernameya fitarê li dar xist. Parlamenter Îmam Taşçier di bernameyê de got: "Heta birêz Ocalan azad nebe, dê pirsgireka kurd çareser nabe."
Komeleya Yekitî û Çandê ya Piştevanî û Alîkariya Kesên li Dergûşa Şaristaniyê Xizmên Xwe Winda Kirine (MEBYA-DER) û Komeleya Alîkariyê ya bi Malbatên Girtî û Hikumxwaran re (TUHAY-DER) ya Amedê, ji bo piştevaniya malbatên girtiyan û malbatên xizmên xwe winda kirine li eywanêke dawete ya li navçeya Bismîlê ya Amedê xwarina fitarê da. Hevserokên HDP'ê yên Bajarê Amedê Zeyyad Ceylan û Gulîstan Atasoy, parlamenterên HDP'ê, rêveberên HDP'ê û DBP'ê û bi sedan malbat beşdarî bernameyê bûn.
Berî fitarê mevlûd hat xwendin û ji bo kesên di têkoşîna azadî û demokrasiyê de jiyana xwe ji dest dan diqeqeyek rêz hat girtin.
BELAVBÛNA TECRÎDÊ
Piştî rêzgirtine hevserokê TUHAY-DER’ê Mehmet Emîn Guzel axivî. Guzel bi lêv kir ku tecrîda li ser Rêberê PKK'ê Abdullah Ocalan belavî hemû qadan bûye û xwest tecrîd bi dawî bibe û girtiyên nexweş tavilê bên berdan û dawî li îşkenceya li girtîgehan were. Guzel xwest hemû malbat piştevaniya Nobedên Edaletê bikin.
‘DÎROK DÊ XIYANETÊ BINIVISÎNE'
Piştî Guzel, Hevserokê MEBYA-DER’ê Şeyhmus Karadag jî axivî û destnîşan kir ku li dijî axa Başûrê Kurdistanê şerek dijwar tê kirin û got: "Ev şer bi hevkariya xiyanetê pêk tê. Malbata Barzanî bi salan e xiyanetê li gelê kurd dike. Wê dîrok vê xiyanetê binivisîne."
'ÇARESERIYA PIRSGIRÊKA KURD AZADIYA BIRÊZ OCALAN E'
Parlamenterê HDP'ê yê Amedê Îmam Taçşier jî destnîşan kir ku heta tecrîda li ser Rêberê PKK'ê Abdullah Ocalan ranebe dê aştî pêk neyê û wiha got: "AKP û MHP dixwaze ku Bakur, Başûr, Rojava û Rojhilatê dagir bike. Divê em jî li dijî vê armanca Tirkiyeyê yekitiya xwe pêk bînin. Yekitiya kurdan di heman demê de wê bibe serkêftina kurdan jî. Bila Barzani jî baş bizane ku heke gerîla winda bike wê Başûr jî têk biçe. Ji ber vê jî divê em ne ji bo malbata xwe divê em ji bo gelê xwe bifikirin û tevbigerin. Çareseriya pirsgirêka kurd bi azadiya birêz Abdullah Ocalan çareser dibe. Ji ber vê yeke jî divê em ji bo azadiya birêz Ocalan bixebitin."