AMED - Nûnerên sazî û partiyên siyasî yên li Amedê ku ji bo piştevaniyê serdana Komeleya Rojnamevanan a Dîcle Firatê kirin, diyar kirin ku dê çapemeniya azad serî netewîne û xcwestin demildest 20 rojnamavanên di binçavan de bên berdan.
Di 8’ê Hezîranê de 20 jê rojnamevan 21 kes hatibûn binçavkirin. Sazî û partiyên siyasî yên li Amedê ji bo piştgiriyê serdana Komeleya Rojnamevanan a Dîcle Firatê kirin û li ber komeleyê daxuyanî dan. Endam û rêvebêrên Partiya Heremên Demokratîk (DBP), Partiya Demokratik a Gelan (HDP), hevserokên HDP û DBP'ê yên Amedê, parlementerên HDP yê, Komeleya Piştevaniyê ya bi Malbatên Girtî û Hikûmxwaran re (TUAY-DER) a Amedê, Komeleya Yekitî Çand Piştevanî û Alîkariyê ya bi Kesên li Dergûşa Şaristaniyê Xizmên Xwe Winda Kirine re (MEBYA-DER), Komeleya Lêkolînên Çand û Zimanên Mezopotamyayê (MED-DER), Federasyona Komeleyên Hiqûq û Piştevaniya bi Malbatên Girtî û Hikûmxwaran re ya Medê (MED TUHAD-FED), Tevgera Jinên Azad (TJA), Komeleya Hiqûqnasan a ji bo Azadiyê (OHD), Komeleya Mafên Mirovan (ÎHD), Yekîtiya Odeyên Mîmar û Endezyaran a Tirk (TMMOB), Dayikên Aştiyê, Hewldana 78'an, Weqfa Mafên Mirovan a Tirkiyeyê (THÎV), Komeleya Wêjekarên Kurd, Komeleya Ekolojî ya Amedê, Komeleya Jinan a ROSA, Komeleya Goç-Derê û gelek kes tev li daxuyanî bûn.
Kesên serdana komeleya rojnamevanan kirin bi çepik û tilîliyan hatin komeleyê. Girse li ber komeleyê dirûşmeya ‘Çapemeniya Azad nayê bêdengkirin’ berz kir û pankarta li ser ‘Nikarin me bêdeng bikin’ hilgirt.
Ewilî Hevserokê HDP a Amedê Zeyyad Ceylan axîvî. Ceylan diyar kir ku çapemeniya azad bi dehan sal e kedeke mezin daye û bûye deng û rengê civakê û got: “Çapemeniya Azad li hemberî şaşî û qirêjiya desthilatê disekine û nuçeyên civakî esas digire, civakê bihêz dike. Ji ber vê jî hedef hatiye girtin. Em vê yekê careke din şermezar dikin û di her şert û mercî de em ê xwedî lê derkevin.”
‘DIXWAZIN BI WAN ÊRÎŞAN CIVAKÊ BITIRSÎNİN’
Pişt re Parlementêra HDP'ê ya Êlihê Feleknas Ûca axivî. Ûca destnişan kir ku bi wan êrîşan û binçavkirinan dixwazin civakê bitirsînin û got: “Sedema girtina hevalên me yên rojnamevan, çêkirina bernameyên ji bo TV'yan e. Ev 3 roj e li ser dosyaya wan biryara qedexeyê heye û parêzer û malbat agahiyê ji wan nagirin. Em baş dizanin ku siyaseta AKP-MHP a faşist çi qasî li hundirê Tirkiyeyê têk diçe ew qas jî li derve êrîşên xwe mezin dike. ”
‘ÇAPEMENIYA AZAD ÇOKÊ DANAYNE’
Ûca da zanin ku pênûsa çapemeniya azad tirsa herî mezin a desthilata AKP-MHP'ê ye û got: “Desthilat xwest hemû çapemeniyê li gor ya xwe b,ne rayê. Lê belê çapemeniya azad ji rêya rast danekeve. Ji ber vê yekê ew qas êrîşan dikin. Çawa çapemeniya azad di salên 90’an de çok danenî, dê îro jî li ber vê faşîzmê çokê danayne, serî neteweî ne û heqîqet tu carî di nav çar diwaran de dîl nayê girtin. Her zarokek gelê kurd û neviyên Apê Mûsa dê bide ser rêya vê heqîqetê û pênûsê hilgire.”
‘ÇAPEMENIYA AZAD NIRX Û RÛMETA GELÊ KURD E’
Piştî Ûcayê Hevserokê MED-DER'ê Rifat Ronî axivî û bilêv kir li welatêkî pîvanên demokrasiyê rewşa çapemeniya azad e û got: “Îro em dibînin ku li welatê me çapemenî tim û tim tê astengkirin. Çapemeniya Azad nirx û rûmeta gelê kurd e, lewma ew qas êrîş li ser tên kirin. Çapemeniya Azad pencereya azadiya gele kurd a cîhanê ye, em vê hedefgirtinê bi tundî şermezar dikin û dibêjin demildest wan hevalên ku hatine girtin divê werin berdan.”
Rêvebira OHD’ê Ozum Vurgun jî diyar kir ku desthilat hewl dide ji binî ve çapemeniya azad bêdeng bike û got: "Niha jî komele, pêkhate û saziyên ku xwestekên wan pêk naynin dikin hedef. 20 rojnameger jî beriya niha bi 2 rojan hatin binçavkirin û derbarê dosyeya wan de biryara sînordarkirinê hatiye dayîn. Em van kiryaran qebûl nakin û li cem rojnamegeran e.”
'EM HÊZA XWE JI APÊ MÛSA DIGIRIN'
Hevseroka Komeleya Rojnamevanan a Dîcle Firatê Dîcle Muftuoglu jî ji bo piştevaniyê malavayî kir û got: “Êrişekî ku 30 sal in didome heye. Buroyên me hatin bombebarankirin me dev ji xebatên xwe berneda. Hevrêyên me hatin qetilkirin, di bi çavan de hatin windakirin. Me wê demê jî got û em niha ji dibêjin em bêdeng namînin û em ê bêdeng nemînin. Em her roj bihêztir dadikevin qadan. Her ku hevrêyek me tê girtin, ciwanek din tevlî xebatan dibe. Em dev ji vê têkoşînê bernadin. Em hêza xwe ji Mûsa Anter, ji Gurbetelî Ersoz û Hafiz, Nujiyan Erhan digirin. Em 30 sal in dinivîsin û berdewam dikin. Tu operesyon jiî nikarin me bêdeng bikin.”
Seroka Komeleya Jinan a Rosayê Adalet Kaya jî êriş şermezar kirin û got: “Di têkoşîna jinê de ked û hewildanek mezin a çapemeniya azad, bi taybetî jî ya JINNEWS'ê heye. Bi rêya wan me rastiya îqtidarê, polîtîkayên dijminatiya kurdan, jinan raxist berçavan. Em dizanin ku wê çapemeniya azad li hemberî van êrişan çokê daneyne. Em jî piştgirî didin berxwedana wan ya bi rûmet."
Di dawiya daxuyaniyê de dirûşmeya "Çapemeniya Azad nayê bêdengkirin" hat berzkirin.