RIHA - Haci Esvet û zarokên wî Adil û Celal Şenyaşar piştî 4 salan cara ewile li cihê hatine qetilkirin tên bibîranîn. Esnafên sûka Pirsûsê li dijî bêedaletiya li malbata Şenyaşar hatiye kirin, derabeyên dikanên xwe venekirin.
Xizm û parastvanên parlamenterê AKP’ê Îbrahîm Halîl Yildiz di 14’ê hezîrana sala 2018’an de dema xebatên hilbijartinê dimeşandin, çûn dikana malbata Şenyaşar û êrişî endamên malbatê kirin. Di dema êrişê de Celal, Adil, Mehmet, Fadil û Ferît Şenyaşar birîndar bûn û rakirin Nexweşxaneya Dewletê ya Pirsûsê. Lê belê li wir rastî xizmên Yildiz ê AKP’î hatin. Di êrişê de Celal û Adil Şenyaşar hatin qetilkirin û bavê wan Haci Esvet Şenyaşar jî li pêş çavên hevjîna wî Emîne Şenyaşar hate lînckirin û qetilkirin.
Çar sal piştî komkujiyê cara ewil e ku ji bo Haci Esvet û kurên wî Adil û Celal Şenyaşar merasîma bîranînê tê lidarxistin. Bîranîna ewil li “Sûka Bîr Milyoncular” hate lidarxistin ku endamên malbatê li wir rastî êrişê hatibûn. Ferît Şenyaşar ku di êrişê de bi birîndarî xelas bûbû û li gel dayika xwe Emîne Şenyaşar 463 roj in li pêşiya Edliyeya Rihayê Nobeta Edaletê didomîne, beriya ku biçe pêşiya edliyeyê hate cihê komkujiyê û ji bo bav û 2 birayên xwe 3 qurnefîl danîn wir. Esnafên sûka Pirsûsê jî bertek nîşanî bêedaletiya li malbata Şenyaşar hatiye kirin dan û derabeyên dikanên xwe venekirin.
‘XELKÊ PIRSÛSÊ BÛYERÊ DIZANE’
Ferît Şenyaşar li pêşiya kargehê axivî û ev tişt anî ziman: “Sê endamên malbata me di 14’ê hezîrana sala 2018’an de li kargeha me ya ku 30 sal bûn me dixebitand hatin qetilkirin. Li kargehê êrişî me kirin û li Nexweşxaneya Dewletê ya Pirsûsê jî rastî komkujiyê hatin. Bi ser bûyerê re 4 sal derbas bûn lê hêj jî ev doz nehatiye ronîkirin. Di vê dozê de em wekî qurban hatin hilbijartin. Êşa me hêj mîna roja ewil e. Tevahiya xelkê Pirsûsê bûyerê baş dizane. Bi ser bûyerê re 4 sal derbas bûn lê xelkê Pirsûsê nîşan da ku ev bûyer ji bîr nekirine. Dê îro li goristanê bîranîn bê lidarxistin. Esnafên sûkê jî derabeyên xwe venekirin û bi awayekî demokratîk berteka xwe nîşan dan. Dibêjin ku ya li me hatiye kirin, li tevahiya xelkê hatiye kirin.”
DÊ LI GORISTANÊ MERASÎM WERE KIRIN
Çar sal piştî komkujiyê cara ewil e ku dê li Goristana Şaredariyê ya navçeya Pirsûsê merasîma bîranînê bi girseyî were lidarxistin. Piştî bîranîna li goristanê jî dê Emîne û Ferît Şenyaşar biçin pêşiya Edliyeya Rihayê û çalakiya xwe ya Nobeta Edaletê bidomînin. Tê payîn ku rêxistinên girseyî yên demokratîk, nûnerên partiyên siyasî û parastvanên mafên mirovan jî beşdarî nobetê bibin.