AMED - Rêxistinên sivîl ên civakî ku li Ameda ji erdhejê bi bandor bû toreke xurt a piştevaniyê ava kirin, alîgirên Amedsporê û HDP li qadê 24 saetan bênavber dixebitin. Li tesîsên Amedsporê ji bo 3 hezar kesên hewcedar xizmeta mayîn û xwarinê tê dayîn. 

 

Li navçeya Bazarcix ya Mereşê erdhejên bi pileya 7,7 û 7,6 çêbûn. Li Ameda yek ji bajarên ku avahî lê hilweşiyan, torên piştgiriyê bi lez û bez ketin nav liv û tevgerê. Platforma Piştevanî û Parastina Bajêr a Amedê, alîgirên Amedsporê û Rêxistinê Partiya Demokratîk (HDP) a Gelan ên navend û navçeyan 24 saetan bi mexdûrên erdhejê re di nav piştevaniyê de ne. 

 

JI 3 HEZAR KESAN RE XWARIN Û CIHÊ MAYÎNÊ 

 

Rêveberî û alîgirên Amedsporê Stadyûma Tahîr Elçî ji bo hewcedaran qadên pêbawer ên lê mayînê vekir û 24 saetan bênavber xizmetê didin. Alîgirên ku bi dildarî dixebitin ev agahî parve kirin: “Em ji sibeya erdhejê ve li vir in. Em serê sibê saet 05.00’an hatin. Em weke hemû alîgiran bi derfetên xwe xizmetê didin 3 hezar kesan. Em hewl didin weke Amedsporê piştevaniyê didin malbatan. Em sibê nîvro û êvarî xwarin, çay û qehweyê belav dikin. Me li ser gelek malperan belavok belavkirin, deriyê me ji malbatên mexdûr re her tim vekiriye. Em di çarçoveya derfetên xwe de her tiştî dikin. Kesên ku pirsgirêka wan a li cih mayînê hebe dikarin xwe bigihînin.”

 

JI ROJA EWIL DERIYÊN XWE VEKIRIN

 

Senîhan Altıntelî ku li tesîsên Amedsporê dimîne jî ji kesên deriyê xwe ji wan re vekirin spasiyên xwe pêşkeş kirin û wiha got: “Bavê min ê di nav cihan de heye. Amedsporê deriyên xwe vekir. Bila sax bin. Ez ji roja ewil ve li vir dimînim. Gelek eleqedar bûn, heta xwarin vexwarinê gelek piştgirî dan. Em ji vir spasiyên xwe pêşkeşî Amedsporê dikin.”