MEREŞ - Serokkomarê AKP’î Tayyîp Erdogan dê biçe serdana Elbistanê. Beriya çûna Erdogan, gelemperiya kavilên navçeyê hatin rakirin. Her wiha lez dan xebatên avakirina konbajar û konteyniran û rê tên paqijkirin.
Li gorî daneyên fermî, di encama erdhejê de li Elbistanê zêdetirî hezar kesan jiyana xwe ji dest dan û nêzî 3 hezar avahî jî hilweşiyan. Bi ser erdhejê re 22 roj derbas bûn lê hêj jî di mijara pêşwazîkirina pêdiviyên gel de pirsgirêk hene. Li hêla din ev nêzî hefteyeke bi lez û bez kavil tên rakirin. Bi sedan kamyon û makîneyên kar anîne navçeyê û navçe di nava tozê de ma ye. Sedema vê lez û beza li navçeyê diyar bû. Hat zanîn ku Serokkomarê AKP’î Tayyîp Erdogan dê sibe bê navçeyê. Hemû kavilên li ser rêgeha Erdogan û li qada navçeyê ku dê lê bigere hatin rakirin û xebatên paqijkirina rêyan didomin.
HER TIŞT JI BO HATINA ERDOGAN E
Destûrê nadin welatiyên ku di nava vê hefteya dawî de li ser kavilan disekinin û hewl didin tiştên xwe binirx jê derxînin. Welatiyekî wiha bertek nîşan da: “Min xwest tiştên xwe yên biqîmet ji bin kavilan derxînim. Min gelek hêvî û rica jê kir lê destûr nedan. Ajakorê makîneya kar ji min re got; ‘Erdogan dê were vê derê û divê em van kavilan bi lez û bez rakin. Em ê nekarin xwe li benda we bigirin. Ji ber ku em karê xwe li gorî saetan dikin.’” Welatiyekê din jî wiha got: “Weke ku malê şewatê be tevdigerin. Tu tiştekî xelkê nema qet nebe bila tiştên xwe ji wir derxînin.”
NEBÊ XEWNA WALÎ ERDOGAN BÛ
Li aliyekî xebatên li navenda navçeyê berdewam in û li rexa din jî bi dehan makîneyên kar û bi sedan kes ji bo bi sibe beriya hatina Erdogan re bigihînin, konbajar ava dikin û konteyniran didanin. Di demeke ku li navçeyê ev bizav didomiya de Walîtiyê Koordînator Gokmen Çîçek digot; “Em dixwazin di roja duşemê de li Elbistaneke cuda hişyar bibin.” Derket holê ku walî ev gotin ji bo hatina Erdogan kiriye. Nexwe li navçeyê hêj gelek gund hene ku hêjta kon jî jê re nehatine şandin.