ŞIRNEX - Asiye Elçîçek a ku piştî 5 salan cenazeyê keça xwe di kartonê de wergirt bi lêv kir ku dewlet bi vê rêbazê dixwaze bi wan bi paş ve gavê bide avêtin û wiha got: “Heta ku em hene em ê pey doza xwe bin. Ew çi bikin dê nekarin me. Yê ku bitirsin ew in. Ew çi bikin ji tirsa xwe dikin.”
Di 14 û 15’ê îlona 2018’an de li herêma Kato Marûnis a girêdayî navçeya Elkê ya Şirnexê di navbera endamên HPG’ê-YJA Starê û leşkerên tirk de şer û pevçûn derketibû. Di pêvçûnê de endama YJA-STAR’ê Menfiyat Elçîçek (Axîn Seydo), Berna Yalman (Hîra Hêvîdar), Guler Ozbey (Nûpelda Sêrt), Azad Satilmiş (Azad Zagros) û Tûgay Çelîk (Reşît Hogir) jiyana xwe ji dest dabûn. Piştî ku Midûriyeta Polîsan a Colemêrgê agahî da malbata Elçîçek, malbat yekser çû Colemêrgê û testa DNA’yê kir. Piştre jî cenazeyê Elçîçek bêyî agahiya malbatê, li goristana bêkesan a Colemêrgê hatibû definkirin. Du roj berê jî Midûriyeta Polîsan a Colemêrgê dîsa li malbatê geriya û jê re got ku cenazeyê keça wan li Saziya Tiba Edlî (ATK) ya Stenbolê ye. Li ser vê yekê malbat çû Stenbolê. ATK’ê, cenazeyê Elçîçek di torbeyekî şîn ê di qartoneke spî de radestî malbatê kir. Dayika Elçîçekê, Asiye Elçîçek a ku cenazeyê keça xwe di qartonê de radestî wê hate kirin ji Ajansa Mezopotamyayê (MA) re axivî.
STANDINA CENAZE
Dayik Elçîçek anî ziman ku tişta ku hatiye kirin îşkenceye û wiha axivî: “Dema ku agahiya şehadeta wê ji me re hat ez ewilî çûm Şirnexê. Min li Şirnexê xwîn da. Pişt re ji min re gotin, 'DNA hev negirt û cenaze ne li gel me ye here ji xwe re lê bigere' Ji wê demê ve me jî xwe ker kir. Piştre jî miduriyeta polîsan a Colemêrgê li me geriya û got, 'Herin Saziya Tiba Edlî ya Stenbolê cenazeyê we li wir e' Ez ewilî çûm Colemêrgê û min kaxiza destûrê ya dozgeriyê stend û ez çûm Stenbolê. Piştî me kirariyên xwe yê li vir pêk anîn ji me re gotin, 'wesayitên xwe nêz bikin' me nêz kir û me û malbata din cenazeyên xwe xistin wesayitên xwe. Hestiyên wê di qartonê de dan me. Piştî ku em hatin Edeneyê me li wir cenaze kefen kir û xiste darbestê û me anî vir û sparte axê.”
'ÇIMA SALA EWILÎ RADESTÎ ME NEKIRIN'
Elçîçek, diyar kir ku wê cenazeyê keça xwe bi serbilindî girt û got: “Çima sala ewilî we cenazeyên zarokên me nedan me? Çima hê birîna me gerim we cenazeyê me nedan me? Çima piştî 5 salan şûnde we cenaze dan? Ew 5 sal bûn ez li heviya cenazeyê keça xwe bûm. Min her digot, ‘xwezî min cenazeyê keça xwe bidita’ kezeba me şewitî. Xwedê mala neyaran xerab bike. Dema ku min cenazeyê keça xwe bi wî rengî standî ez xemgîn bûm lê ji aliyekî ve jî keyfxweş bûm. Çimkî hin dayikên ku bi salan e hestiyên zarokên xwe nedîtine hene. Min cenazeyê xwe anî malê ev ji min re serbilindî bû. Dema ku li ber morgê jî bûm, min got, ‘ez qurbanê van cenazeyan bim’ polîs li dora me kom bûn lê tiştek nekirin.”
‘EW ÇI BIKIN DÊ NEKARIN ME’
Elçîçek, bi lêv kir ku ew ê tu carî serê xwe netewînin û ev tişt got: “Bi Xwedê ew çi bikin em li ser doza xwe nayên xwarê. Em ji doza şehîdên xwe nayên xwarê. Heta ku em hene em ê pey doza xwe bin. Ew çi bikin dê nekarin me. Yê ku bitirsin ew in. Ew çi bikin jî ji tirsa me dikin. Bi xwedê ew çi bikin jî ew nikarin me.”
Di vê keliyê de dayika Asiye kilama ku li ser keça xwe gotiye distiriya.