NAVENDA NÛÇEYAN - 35 partiyên siyasî yên li Bakur û Rojhilatê Sûriyeyê bi daxwaza “Êrişên Tirkiyeyê bidin sekinandin” bang li NY û Yekitiya Ereban kirin.
Êrişên dewleta tirk û koma wê ya paramîlîter SMO’yê yên li ser Bakur û Rojhilatê Sûriyeyê didomin. Saziyên navneteweyî jî li dijî êrişên dewleta tirk bêdeng in. 35 partiyên siyasî yên li Bakur û Rojhilatê Sûriyeyê diyar kirin ku êrişên dewleta tirk ên li ser Bendava Tişrînê binpêkirina hiqûqa navneteweyî ye û ji Neteweyên Yekbûyî (NY) û Yekitiya Ereban xwestin ku van êrişan bidin sekinandin.
35 partî û tevgerên siyasî, civakî û jinan têkildarî êrişên dewleta Tirk ên li dijî herêmê û piştgiriya hêzên HSD’ê li dijî van êrişan daxuyaniyeke nivîskî da.
‘TIRKIYE DIXWAZE BENDAVA TIŞRÎNÊ DAGIR BIKE’
Di daxuyaniyê de hat gotin di vê pêvajoya heyî de çavê tevahî cîhanê li pêkanîna aştî, xurtkirina nirxên mafên mirovan û misogeriya pergala demokratîk a pirrengî li Sûriyeyê piştî hilweşîna rejîma Baasê ye. Bi domdarî wiha hate gotin: “Lê rejîma Tirkiyeyê ji dema hilweşîna rejîma Sûriyeyê bênavber êrişên xwe yên hovane li dijî Herêma Bakur û Rojhilatê Sûriyeyê didomîne û di vî şerî de piştgiriyê dide komên terorîst ên girêdayî xwe ku li dijî herêmê şerekî pêk bînin. Armanca dewleta Tirk ji vê yekê binesaziyan mîna Bendava Tişrînê û pira Qereqozaqê kontrol bike. Êrişên wiha yên bênavber rewşên guncaw ji bo jinûve DAIŞ`ê xwe bi rêxistin bike, ava dikin. Ev yek jî li ser ewlehî û îstîqrara li herêmê û cîhanê xeteriyek e.”
‘SIVÎL HATIN QETILKIRIN’
Di dewama daxuyaniyê de hat diyarkirin ku duh balafirên şer ên dewleta Tirk li dijî sivîlên li Bendava Tişrînê êrişeke hovane pêk anî, di encamê de sivîl hatin qetilkirin û birîndar çêbûn. Daxuyanî wiha domiya: “Ev sûcên dewleta Tirk binpêkirinên aşkera yên rêgezên qanûna navneteweyî û mirovî ne. Em, êrişên hovane yên dewleta Tirk li dijî herêmê û hedefgirtina sivîlan şermezar dikin. Em bang li NY, Konseya Ewlehiya Navneteweyî û Komkara Erebî dikin ku bi lez tev bigerin û van êrişên dijminane yên ku qanûnên navneteweyî bin pê dikin û îstîqrara herêmê têk dibin, rawestînin.
Em li dijî van êrişan, li kêleka hêzên xwe yên leşkerî ne û bang li gelê herêmê dikin ku li dora HSD’ê ku misogeriya pêşeroja gelan e, bicivin. Ji ber ku van hêzan terora DAIŞ’ê têk bir û zemînek ji bo avakirina Rêveberiya Xweseriya Demokratîk ku mafên tevahî pêkhateyan pêk anî, ava kir.”
NAVÊN PARTIYAN
Partiyên ku daxuyanî dane ev in: “Partiya Yekitiya Demokratîk (PYD), Partiya Kesk a Demokrat, Partiya Aştiya Demuqrat a Kurdistanê, Partiya Lîberal a Kurdistanê, Partiya Komunîst a Kurdistanê, Partiya Demoqrat a Kurdî ya Sûrî (P.D.K.S), Partî Demuqratî Kurdistanî-Sûrî, Partiya Çep a Demokrat a Kurd li Sûriyê, Partiya Çep a Kurd li Sûriyê, Partiya Sûriyeya Pêşerojê, Partiya Guhertina Demoqrat a Kurdistanê, Partiya Nûjen a Kurdistanê, Yekitiya Karkerên Kurdistanê, Desteya Nîştimanî ya Erebî (Heyai El Weteniya El Erebiya), Partiya Nûjen û Demokrat a Sûriyeyê, Partiya Rêkeftina Demokratîk a Kurdî Sûrî, Partiya Çaksaziyê - Sûriye, Partiya Asûrî ya Demokratîk, Partiya Biratî ya Kurdistanê, Partiya Roj a Demokratîk li Sûriyê, Tevgera Civaka Demokratîk (TEV-DEM), Kongra Star, Partiya Muhafezkaran, Partiya Têkoşîna Demokrat, Şepêla Pêşeroja Kurdistanê (Ş.P.K), Partiya Demokrat a Kurdistanê-Rojavayê Kurdistanê, Heyet El Tensîq El Weteniye - Hereket El Texyîr El Demokratî, Partiya Yekitiya Suryanî, Partiya Kombûna Nîştimanî ya Kurdistanê (P.K.N.K), Partiya Demuqrat a Kurd li Sûrî (PDK), Partiya Yekitiya Demokrat a Kurd li Sûriyê (Yekitî), Şepêla Çep a Şoreşger li Sûriye, Partiya Suraya, Kongreya Netewî ya Kurdistan (KNK) û Partiya El Weten El Sûrî.”