Li Girtîgeha Tîpa L a Panosê ya Agiriyê gardiyan û xebatkarên girtîgehê êrişî girtiyan kiribûn û derb kiribûn. Baroyên Agirî, Colemêrg û Wanê û şaxên Komeleya Mafên Mirovan (ÎHD) û Komeleya Hiqûqnasên ji bo Azadiyê (OHD) piştî lêkolînan têkildarî bûyerê raporek amade kir. Rapor, li Eywanan Konferansan a Tahir Elçî ya Baroya Wanê bi beşdariya gelek hiqûqnasan hate eşkerekirin. 

 

Rapor, ji hêla endama Şaxa OHD’ê ya Wanê Dîlan Çîftçî ve hate xwendin. Dîlan Çîftçî, da zanîn ku di 18’ê Kanûna 2024’an di nav xwarina şîvê de hinek tiştên mîna çêrta çûkan derketine û wiha got: “Li ser vê yekê girtiyên bi navên H.G, H.O û R.B. agahî dan peywirdaran. Ji vê kêliyê ve bûyer dest pê kir. Girtiyan ev rewş bi daxwaznameyekê ragihandin. Çendek roj piştre jî rastî êrişa fîzîkî ya gardiyanan û personelên îdareyê hatin. Girtî nizanin ka hejmara wan çend bû lê piranî jê zilam bi giştî rastî êrişa 40-50 kesan hatine. Girtiyan gotin ku bi cop û mertalan hatine derbkirin, li erdê hatine kaşkirin û bi giranî birîndar bûne. H.O., da zanîn ku destên wê hatine şidandin û canê wê êşiyaye, H.G. û R.B. jî diyar kirin ku ew li dîwar hatine xistin, li erdê hatine kaşkirin, R.B. jî got ku pora wê hatiye kişandin û jêkirin.” 

 

'SEPANÊN KEYFÎ Û DERHIQÛQÎ’

 

Bi domdarî Dîlan Çîftçî destnîşan kir ku li gel îşkence û miameleya xerab, piştî bûyerê jî mafê kantînê yê girtiyan hatiye astengkirin. Dîlan Çîftçî, wiha pê de çû: “Mafê telefonê yê girtiyan hat astengkirin û cezayên hucreyê yên keyfî lê hatine birîn. Dema şande ji bo hevdîtina bi girtiyan re çûn girtîgehê, şandeya me bi xwe bû şahidê liv û tevgera keyfî ya memûrên girtîgehê. Tevî ku her sê girtiyên şandeya me dixwest pê re hevdîtinê bike li heman odeyê bûn jî, xebatkarên girtîgehê bi israr gotin ku nikarin her sê girtiyên jin ji odeyê derxînin û bînin hevdîtinê. Şandeya me xwest di vê mijarê de bi midûriyeta girtîgehê re hevdîtinê bike lê encmake jê negirt. Weke çareya dawî jî bi dozgerê saziyê re hevdîtin kir û piştî hevdîtinê ev sepana keyfî hat bidawîkirin.” 

 

'ZEXT HATE TESPÎTKIRIN’

 

Di berdewamê de Dîlan Çîftçî anî ziman ku girtiyên dixwestin pê re hevdîtinê bikin ji hêla 4-5 gardiyanan ve cuda cuda anîne odeya hevdîtina bi parêzeran re û ev agahî parve kir: “Heta hevdîtin qediyayî gardiyan li cihekî ku axaftinan bibihîsin sekinînin. Şandeyê îtîraz kir lê encam jê negirt. Şandeya me bû şahid ku memûrên tev li bûyera îşkence û muameleya xerab bûn, di dema hevdîtina bi parêzeran re de zext kirin. Hat tespîtkirin ku li girtîgehê Protokola Stenbolê esas nehatiye girtin. Di hevdîtinê de dozger bi xwe got ku tev li lêgerîna qawîşan bûye. Her wiha li gorî îfadeyên wî, di 18.12.2024’an di dema mudaxileyan de bi rêya kamerayan bûyer heta dawiyê şopandiye lê neçûye cihê bûyerê û mudaxile nekiriye. Dema li van îfadeyan tê nihêrtin, eşkereye ku ji destpêkê heta dawiya tevahiya bûyerê di bin kontrola dozgerê saziyê de qewimî ye.” 

 

XWEST BERIPIRSYAR BÊN CEZAKIRIN 

 

Dîlan Çîftçî, da zanîn ku girtiyan piştî çavdêrî û raporê daxwazname dane dozgeriya înfazê lê sê roj piştî hevdîtinê hatine sirgunkirin. Dîlan Çîftçî, axaftina xwe wiha qedand: “H.O. sewqî bajarê Erzînganê, H.G. û R.B. jî sewqî girtîgehên cuda yên Kayseriyê hatin kirin. Divê tavilê der heqê xebatkarên girtîgehê yên di bûyera îşkenceyê de cih girtin, lêpirsînek baş were destpêkirin. Divê doz li van kesan were vekirin û berpirsyar bên cezakirin. Ji bo heqîqet derkeve holê û berpirsyar bên cezakirin, hewceye tevahiya dîmenên kamereyan ên Girtîgeha Tîpa L a Panosê, qeydên dîmenên kamerayên bi stûyê xebatkaran ve bêyî bên jêbirin bên parastin û li dosyayê bên zêdekirin. Heke dema her sê jinên girtî hatin derbkirin, berê kamerayên cihê derbkirinê dibînin hatibin guherandin, divê kesên berê kamerayan guherandin tavilê bên tespîtkirin û derheqê wan de lêpirsîna edlî û îdarî bê vekirin.” 

 

Dîlan Çîftçî, got ku girtî hatine îşkencekirin û xwest binpêkirinên li dijî girtiyan bên bidawîkirin.