AMED – TJA’yê dayika Rêberê Gelê Kurd Abdullah Ocalan, Uveyş Ocalan bi van gotinan bi bîr anî: “Em ê hêviyên aştî û azadiyê yên hemû dayikên xwe, bi avakirina civaka demokratîk tacîdar bikin.”
Tevgera Jinên Azad (TJA) bi boneya sala 32’yemîn a wefata dayika Rêberê Gelê Kurd Abdullah Ocalan, Uveyş Ocalan daxuyaniyeke nivîskî weşand.
Daxuyanî wiha ye:
Hiqûqa dayikbûnê, doktrîneke ku zanyariyên herî pîroz ên erdnîgariyên kevnar di xwe de dihewîne. Erdnîgariya Kurdistanê bi pîrozbûna xwedawenda dayik a bi hezaran salan wate daye rastiya dayikbûnê û wek diyariyeke bêhempa li bîra mirovahiyê zêde kiriye. Vê axa ku bi bereketa dayika pîroz hatiye avdan, bi hestiyariya wê jiyaye, zarokên xwe bi hişmendiyeke exlaqî û polîtîk mezin kirine, bûye qada herikbariya azad a civakîbûnê. Li hemberî hişmendiya serdest a tarî ya ku li dijî tevahiya bedewiyên der barê civakê û jinan de şer dike, bi inyad, bi tililiyên xwe, bi lorîkên xwe, carinan bi hêrs û bi hişmendiya parastinê aliyê herî bedew ê berxwedanê jî bi hiqûqa dayikbûnê he kiriye. Temara berxwedanê ya Besêyan, Zerîfeyan, Rindêxanan bi vê doktrînê xurt bûye, şoreşa çandî, zanyariya dîrokî û seknan jinan ragihandiye roja me ya îroyîn. Dayikbûn, li Kurdistanê, beriya her tiştî serhildana li dijî dîlîtiyê û afirandina heza ji jiyana azad e. Dayika Uveyş a ku Can Daye Serhildanekê, zanyariyên pêşîn ên temarên berxwedanê yên jinan veguhastiye, hêviya jiyana azad a gelê xwe mezin kiriye û bûye pêşenga vejîna li Kurdistanê.
NASNAMEYA JINA AZAD HERÎ ZÊDE DEYNDARA DAYIKA UVEYŞ E
Mirovê Azad ê ku îxaneta li hemberî dayika ku şîrê wê vexwariye û nirxên xwedawendiyê yên ku nûneriya wan dike wek îxaneta li jiyanê dinirxîne, hînbûyînên xwe yên pêşîn ji dayika xwe wergirtine û li ser vê axê, xeta jina azad vejandiye. Nasname û sekna jina azad a ku bi Bîrdoziya Rizgariya Jinê xwebûna xwe diparêze, îro ji bo cihê ku li cîhanê lê ye, herî zêde jî deyndara Dayika Uveyş e. Xeta jina azad a ku di kesayeta Dayika Uveyş de, li hemberî hêzên paşverû yên cîhanê meydanê dixwaze, dayikê bi tenê wek giyanewereke biyolojîk nabîne, bi zanîna xwe, bi têkoşîna ku hevjiyanê azad dike, bi sekna bê tawîz a li hemberî faşîzmê û mêtingeriyê, vê biharê jî bi hêvî û kelecana ronesanseke nû pêşwazî dike.
EM Ê TÊKOŞÎNA XWE YA JI BO MAYÎNDEKIRINA XETA JINAN BILIND BIKIN
Wek hêza pêşeng a Aştiyê û Civaka Demokratîk, bi kevneşopiya berxwedanê ya qedîm a ku me ji dayikên xwe wergirtiye, em ji hemû deman zêdetir nêzî avakirina jiyana nû û civaka azad in. Angaşt û israra me ya avakirina siberojeke li ser bingeha azad a bi zanîna dîrokê, ji bo me ji hemû deman hêzdartir e û angaşta me ji hemû deman mezintir e. Bê guman em ê îxanetê li vê kevneşopiya ku em gihandine van rojan û hiqûqa dayikbûnê nekin û em ê têkoşîna xwe ya ji bo mayîndekirina xeta jinan a li ser vê axê bilind bikin.
EM SOZA AVAKIRINA CIVAKA DEMOKRATÎK DIDIN
Li ser vê bingehê, em tevahiya dayikên xwe yên ku çanda berxwedanê gihandine me, ligel tevahiya zehmetiyên şer rojekê jî dev ji têkoşîna xwe bernedane û jiyana xwe di oxira vê têkoşîna bi rûmet de dane, di kesayeta Dayika Uveyş û Dayika Sakîne de bi minet û rêzdariyeke mezin bi bîr tînin. Em soza xwe dubare dikin ku em ê hêviyên aştî û azadiyê yên tevahiya dayikên xwe yên ku dengê aştiyê ne, bi avakirina civaka demokratîk a ku em ê bibin sazûmankarên wê, pêk bînin.”