16 serokên baroyan, di 17-18'ê Hezîranê de li EnqerEYê bi partiyên siyasî û Serokê Meclisê Nûman Kûrtûlmûş re civiyan û ji bo çareserkirina pirsgirêka kurd xebata xwe ya ji bo beşdarbûna di "Pêvajoya Aştî û Civaka Demokratîk" de didomînin. Serokên baroyan di civînan de pêşniyazên xwe yên çareseriyê yên ji 17 xalan pêkhatî pêşkêş kirin.

 

GIRÎNGIYA PÊVAJOYÊ

 

Serokê Baroya Agiriyê Serdar Gunakin ku di hevdîtinan de amade bû, got ku pêvajoya 50 salan "birînek xwînrij" e. Gunakin bal kişand ser wê yekê ku divê aqûbeta vê pêvajoyê nebe wekî ya pêvajoyên berê û got: "Ji bo ku ev pêvajo neyê sabotekirin, pêdivî ye ku ji hêla raya giştî, çapemeniyê û ya herî girîng, aktorên siyasî xwedî lê bê derketin. Ev bi têgihîştineke di ser siyasetê re gengaz e."

 

Gunakin destnîşan kir ku wan wekî baroyan ji bo beşdarbûna di pêvajoyê de înîsiyatîf girtiye û got: "Em bawer dikin ku ne tenê partî, divê hemû beşên civakê xwedî li vê pêvajoyê derkevin. Ji bo vê armancê, me di 18-19'ê Hezîranê de li Meclisê bi hemû partiyan re, di serî de partiya desthilatê û partiya muxalefetê, civîn li dar xistin. Armanca me ya sereke di van civînan de ew bû ku em bang li hemû aktorên siyasî bikin ku di têkoşîna ji bo lihevkirina civakî, aştî û bidawîbûna pevçûnan de bi feraseteke di ser siyasetê re xwedî li pêvajoyê bê derketin. Em bawer dikin ku lihevkirina civakî tenê bi vî rengî pêk bê." 

 

Gunakin bal kişand ser girîngiya rola Meclisê û got: "Berteka Meclisê di vê pêvajoyê de pir girîng e. Me ji wan jî xwest ku xwedî li pêvajoyê derkevin û li dijî bêrûmetkirina pêvajoyê bertek nîşan bidin. Me ji hemû partiyên siyasî xwest ku bi serokên xwe yên bajaran, parlamenter û derdora xwe re li ser vê pêvajoyê civînan li dar bixin û pêvajoyê rave bikin. Ev pêvajo ji bo ji nû ve avakirina demokrasiyê li Tirkiyeyê pir girîng e."

 

PIŞTGIRIYA HIQÛQÎ

 

Gunakin diyar kir ku hevdîtinên ku wan kirine erênî bûne û got: "Partiyên siyasî di warê xwedîderketina li pêvajoyê de pir erênî nêzîk bûn. Hêviyên me hinekî din mezin bûn. Me dît ku dê ji aliyê hemû aktorên siyasî ve xwedî lê bê derketin. Me pêşniyazên xwe yên ji 17 xalan pêkhatî jî pêşkêş kirin. Me got ku ji bo destûra bingehîn divê li meclisê komîsyon bê avakirin û em ê bi kêfxweşî di warê hiqûqî de piştgiriyê bidin vê." 

 

'DIVÊ GIRTÎ SERBEST BÊN BERDAN'

 

Gunakin behsa rewşa girtiyên siyasî jî kir û wiha dawî li axaftina xwe anî: "Divê hemû girtiyên siyasî serbest bên berdan. Divê binesaziya qanûnî ya vê yekê berî Destûra Bingehîn bikeve meriyetê. Dibe ku Meclis di demeke nêzîk de dest ji biryara xwe ya betlaneyê berde û sererastkirinên qanûnî yên pêwîst bike."