Zozan Bor a li midûriyeta polîsan hat tacizkirin: Kevalên min hê jî di binçavan de ne

2024-11-28 09:08:08


	 

	WAN - Perwerdekara wêneyan Fatma Zozan Bor ku di pêşangeha 25'ê Mijdarê ya li Tetwanê hat vekirin de hat binçavkirin, diyar kir ku li midûriyeta polîsan rastî taciza fizîkî û devkî hatiye û got: "Wêneyên min hê jî di binçavan de ne."

	 

	Di çarçoveya projeya Komeleya Aryen Huner a "Ji Çaran Çar, Jin Huner" de, bi minasebeta 25'ê Mijdarê Têkoşîna Navneteweyî ya Li Dijî Tundiya Li Hemberî Jinê li Tetwan a Bedlîsê, li Navenda Bazirganiyê ya Yaşamê (AVM) pêşangehek hat vekirin. Pêşengeh ku berhemên hnermendên jin lê cih digirtin, piştî demekê ji aliyê polîsan ve hat astengkirin û perwerdekara wêneyan a Komeleya Aryen Huner Fatma Zozan Bor hat binçavkirin. Tabloyên Zozan Borê ên li pêşangehê jî ji aliyê polîsan ve hatin desteserkirin. Zozan Bor a ku piştî binçavkirinê li Midûriyeta Polîsan a Bedlîsê lêgerîna tazî lê hat ferzkirin, peyama "Em ê têkoşîna xwe bidomînin, em ê tu carî paşve gav neavêjin" da.

	 

	‘EM DIXWAZIN JINAN BIGIHÎNIN HUNERÊ'

	 

	Zozan Borê destnîşan kir ku wan projeya "Ji Çaran Çar, Jin Huner" pêk aniye û di van xebatan de tenê bi jinan re huner çêkirine û wiha got: “Me tenê bi keda jinan berhemên hunerî afirandin. Di çarçoveya lêkolînan de me atolyeyên di warê wênesaziyê de li dar xist. Me pêşangehek ji kevalên van atolyeyan çêkir û li wir nîşan da. Me pêşangeha yekem li Wanê li dar xist. Me xwest ya duyemîn jî li navçeya Tetwan a Bêdlîsê pêk bînin. Armanca me ew bû ku em hunera jinê li her derê bigihînin jinan."

	 

	Zozan Borê diyar kir ku tevî hemû destûrên pêwîst ji aliyê Midûriyeta Polîsan a Bedlîsê ve bi ser pêşengehê de hatiye girtin û wiha got: "Heta ku xebatên amadekariya pêşangeha me dewam dikirin, kesên ku unîfroma ne li wan û û nasname nîşan nedidan, mudaxileyî pêşangeha me kirin. Dema ez vegeriyam berî ku karê pêşangeha me bi dawî bibe, kevalên min di destê wan de bûn û perçeyên wan diketin erdê. Ji ber vê yekê min bertek nîşan da û min pirsî: 'Tu kî yî û çi dikî?' Ji min re got 'Ez midûrê polîsan im, dewlet im, çi bixwazim dikarim bikim.' Wêneyên min hatin desteserkirin."

	 

	‘LÊGERÎNA TAZÎ, TACÎZA DEVKÎ Û FÎZÎKÎ'

	 

	Zozan Borê bilêv kir ku li Midûriyeta Polîsan a Bedlîsê rastî lêgerîna tazî, heqaretan û tacîzê hatiye û wiha got: “Ez rastî tacîza fîzîkî hatim. Ev destwerdan û nêzîkatî ne asayî ne. Ev nêzîkatî destwerdana li çand û hunera kurdî ye. Me di çarçoveya 25'ê Mijdarê Roja Têkoşîna Navneteweyî ya Li Dijî Tundiya Li Hemberî Jinê de xebatên xwe meşand û hemû xebatên me bi mijara jinê, bi keda jinan bû. Em rastî bêtehemûliya dewlet û pergalê ya li hemberî jinê û keda jinê hatin. Em berî rastî tacîza polîsên sivîl bên jî, ji aliyê polîsên li wir hatibûn peywirdarkirin dihatin tacîzkirin. Tevî ku me berê jî telefon kiribû û me gotibû çima û bi çi armancê pêşangeh hatiye lidarxistin jî, em rastî vê helwestê hatin. Ew cihekî şaredariyê bû û me hemû destûrên pêwîst standibûn."

	 

	KEVALÊN WÊ HÊ JÎ DI BINÇAVAN DE NE!

	 

	Zozan Borê anî ziman ku zext û destwerdan ne asayî bûn û wiha got: “Di rojeke wiha watedar de ev destwerdan qet ne asayî bû. Xebatên hatin desteserkirin ji bo bîranîna jinên hatin qetilkirin hatibûn çêkirin. Xebatên me yên ku bi navên hemû jinên li çar aliyê cîhanê hatine qetilkirin, hatin desteserkirin. Ev kar, pir baş dihatin kirin. Mudaxileyên ku li gel, sazî û hunermendên ku tundiyê nîşan didin tên kirin, ji bo asayîkirina tundiyê ye. Du xebatên me hê jî li Midûriyeta Polîsan a Bedlîsê girtî ne. Her çiqas ez hatim berdan jî keda min li min venegerandin. Me hemû pêvajoyên qanûnî yên pêwîst dane destpêkirin. Dema me li Tetwanê pêşangehek li dar xist, gel gelekî kêfxweş bû û got ku cara yekem e tiştekî wiha dibîne. Hewl dan pêşî li vê rewşê bigirin. Destûr nehat dayîn ku xebateke hunerî bê çêkirin, mudaxile kirin û xwestin gel çavtirsandî bikin. Em destûrê nadin tiştekî ku ne di çarçoveya daxwazên me de be. Em nêzîkatiyên bi vî rengî qebûl nakin."