ROJEVA 29'Ê KANÛNA 2023'YAN
- rojane
- 09:00 29/12/2023
Li Sêrtê gelek siyasetmedarên DEM Partî û DBP’ê hatin binçavkirin.
Nûçegihanê me Hakan Yalçin li Wanê di encama serdegirtina malê de hate binçavkirin.
Di êrişa dewleta tirk ya li ser Şengalê de 5 karker jiyana xwe ji dest dan.
Rûşan Erdem ku piştî 12 sal û 7 mehan ji girtîgehê derket, li ber deriyê girtîgehê got: "Hêleke me her tim têkoşîn e."
Di salvegera 12’emîn a Komkujiya Roboskê de li gelek bajaran daxuyanî hatin dayîn. Di daxuyaniyan de bal hate kişandin ku faîl bê ceza hatine hiştin û wiha hate gotin: “Heta ku Roboskê neyê ronîkirin edalet nayê Tirkiyeyê.”
Çalakvanên li Amed, Wan, Îzmîr û Mêrsînê Nobeta Edaletê didomînin, anîn ziman ku dê daxwaza azadiya Abdullah Ocalan bidomînin.
Rêxistinên hiqûq û mafên mirovan diyar kirin ku astengkirina hevdîtinên parêzer û malbatan ên bi Abdullah Ocalan re rêbazekî îşkenceyê ye û wiha gotin: “Divê daxwazên girtiyên di greva birçîbûnê de bên guhdarîkirin û deriyên Îmraliyê bên vekirin.”
Qurbaniyên Komkujiya Roboskê di salvegera 12’emîn de hatin bibîranîn. Hevseroka Giştî ya DEM Partiyê Tulay Hatîmogûllari di bîranînê de diyar kir ku dê tu carî komkujiyê ji bîr nekin û wiha got: “Zîhniyeta ku Komkujiya Roboskê pêk anî, îro li Rojava komkujiyan dike.”
Di êrişên dewleta tirk ên li dijî Bakur û Rojhilatê Sûriyeyê de derhêner Mensûr Kerîmyan hate qetilkirin.
Hevserokê Giştî yê HDP’ê yê berê Selahattîn Demîrtaş axaftinên Erdogan ên piştî Mutabaqata Dolmabahçeyê ku digot; “Em bi hesret li benda vê bangawaziyê bûn” û “Ez wê civînê rast nabînim” bi bîr xist û ev pirs kir: “Çi bû ku Erdogan di nava 22 rojan de fikra xwe guherand?”
Endama Hîndekariyê ya Zanîngeha Îbrahîm Çeçen a Agiriyê Doç. Dr. Tûba Işik di bin wêneya merasîma cenazeyên kesên li Roboskê hatin qetilkirin de bi nivîsa “Dîmen pir xweş e, bila domdar be” parvekirina dijminatiya kurdan kir.
Parêzerên Bûroya Hiqûqê ya Sedsalê ji bo hevdîtina bi miwekîlê xwe Rêberê PKK’ê Abdullah Ocalan ku 34 meh in tu agahî jê nayên girtin, serî li Serdozgeriya Komarê ya Bursayê û Midûriyeta Girtîgeha Îmraliyê dan.
Amûrsaz Yûsûf Akin di oprasyona leşkerî de hatibû qetilkirin û bi ser qetilkirina Akin re 13 sal derbas bûn. Di danişîna dozê ya îro de hat îdiakirin ku bi sedema “ewlehiyê” keşf nehatiye kirin û dîsa biryar keşfê hate dayîn.
Di bombebarana dewleta tirk a li dijî Eyn Îsayê de zarokeke 16 salî birîndar bû.