AMED - bo meşa TJA’yê ya bi dirûşma “Em ber bi azadiyê ve dimeşin” dê di 1’ê Cotmehê de li Amedê oxirkirineke girseyî were lidarxistin. Jinan, got ku daxwaza wan a sereke azadiya fîzîkî ya Abdullah Ocalan e.
Tevgera Jinên Azad (TJA) dê ji Amedê ber bi Enqereyê ve bi dirûşma “Em bi hêvî ber bi azadiyê ve dimeşin” meşê li dar bixe. Meş dê di 1’ê Cotmehê de dest pê bike û rawestgeha ewil a meşê dê navçeya Curnê Reş a Rihayê be. Piştre jî dê meş li Dîlok, Edene, Mêrsîn, Konya û Enqereyê bidome. Nûnerên gelek saziyên jinan dê di meşê de cih bigirin.
DI 1’Ê COTMEHÊ DE OXIRKIRINA GIRSEYÎ
Wekîla DEM Partiyê ya Mêrdînê Bêrîtan Guneş Altin diyar kir ku daxwaza sereke ya meşê azadiya fîzîkî ya Rêberê Gelê Kurd Abdullah Ocalan e û got: “Her cihê em diçinê xwedî berxwedanê ye û em ê wê berxwedanê bi bîr bixin. Azadiya fîzîkî ya birêz Ocalan her wiha azadiya jin û civakê ye. Ji bo avakirina aştiyê azadiya birêz Ocalan pir girîng e. Ji bo azadiya birêz Ocalan li her devera cîhanê bi milyonan kes daketin qadan û meşên biheybet li dar xistin. Ev meş jî berdewamiya wê ye. Dê gel daxwaza xwe ya azadiyê biqîre.”
Bêrîtan Guneş Altinê got ku dê di 1’ê Cotmehê de li Amedê oxirkirineke girseyî bibe û ev tişt anî ziman: “Divê birêz Ocalan bilez azad bibe. Di tevahiya meşê de em ê girîngiya vê vebêjin. Rêya aştiyê, azadiya fîzîkî ya birêz Ocalan e. Em ê di meşê de bernameyên cuda li dar bixin. Dê bi jinan re hevdîtinan bikin û pêvajoyê vebêjin. Em hemû kesî vedixwînin vê meşa dîrokî.”
BANGA TEVLIBÛNA MEŞÊ
Arzu Kahraman a TJA’yî jî bal kişand ser girîngiya meşê û got: “Em jin xwedî li pêvajoyê derdikevin û têkoşînê didomînin. Rêya aştî û azadiya gelên Rojhilata Navîn, azadiya fîzîkî ya birêz Ocalan e. Divê ‘mafê hêviyê’ yê birêz Ocalan tavilê bikeve meriyetê. Ji bo azadiya fîzîkî û domandina pêvajoyê aştiyê em dimeşin. Tevlibûna meşê, pêşengtî kirina azadiyê û xwedîderketina li pêvajoyê ye. Em banga tevlibûnê li tevahiya gelê me dikin.”