SÊRT - Siyasetmedarên Sêrtê gotin ku ji bo encamek ji nîqaşên têkildarî çareseriya pirsgirêka Kurd derkevin, divê îktîdara AKP’ê gavên şênber biavêje û hewceye Abdullah Ocalan jî ji hela fîzîkî ve azad be.
Şandeya Îmraliyê ya Partiya Wekhevî û Demokrasiyê ya Gelan (DEM Partî) di 28’ê Kanûna 2024’an de li Girtîgeha Tîpa F a bi Ewlekariya Bilind a Îmraliyê bi Rêberê PKK’ê re hevdîtin kir. Şandeyê, piştî hevdîtinê deklarasyoneke ji 7 xalan pêk tê weşand û nîqaşên ser deklarasyonê didomin. Şandeyê piştre jî bi partiyên siyasî yên koma wan li Meclisê re hevdîtin kir û di 22’yê Çileyê de dîsa çû Îmraliyê û hevdîtin kir. Nûnerên partiyên siyasî yên li Sêrtê, têkildarî peyamên Abdullah Ocalan û nîqaşên ser çareseriyê axivîn.
'DIVÊ DEVLET ŞEFAF BE’
Hevserokê DEM Partiyê yê Sêrtê Eşrev Tekîn got ku li bajarê wan Kurd, Ereb û Tirk bi hev re dijîn û ew di xebatên xwe de ser çareseriyê nîqaşan dikin. Tekîn, wiha got: “Her kes qala aştiyeke birûmet dike. Ji bo pêvajo veguhere çareseriyê, divê her kes berpirsyartiyê li xwe bigire. Îktîdar, dikeve nava pratîkên zirarê didin pêvajoyê. Di êrişên ser Bakur û Rojhilatê Sûriyeyê de rojnameger, siyasetmedar, jin, zarok qetil kirin. Xelk dixwaze ku şefaf bin. Xelk dixwaze mirin bi dawî bibin û çek rawestin. Heke dewlet çekan nede sekinandin dê zirarê bide pêvajoya aştiyê.”
Tekîn, anî ziman ku aqilê dewletê yê gelê Kurd vexwendî ser maseyê divê êrişan bide sekinandin û got: “Berê jî pêvajoyek hebû. Dan sekinandin û zirarekê mezin gihişt gel. Plana têkbirinê têk çû. Heke aqilê dewletê jidil be, divê li kirinên xwe hişyar be. Divê tecrîda ser birêz Ocalan rakin û hevdîtinên bêyî tecrîdê bidomin.”
'DIVÊ JIN DI PÊVAJOYÊ DE CIH BIGRIN’
Hevseroka Partiya Herêmên Demokratîk (DBP) a Sêrtê Muazzez Bulgan jî got: “Gel, ji ber pêvajoyê bi kelecan e. Piştî demekî dirêj ji birêz Ocalan agahî hatin girtin û ev yek girîng e. Lê tecrîd hêj didome. Divê îktîdar dev ji helwesta xwe ya êrişkar berde. Ji bo serkeftina pêvajoyê divê birêz Ocalan azad bibe û jin pêşengtiya pêvajoyê bikin. Di şer de herî zêde jin êşê dikişînin. Girîng e ku pêşengtiya pêvajoyê bikin. Divê hemû jin û derdor di pêvajoyê de cih bigirin.”
'PÊVAJO ENCAMA TÊKOŞÎNA GEL E’
Hevserokê Navçeya Navendî ya DEM Partiyê Şernas Çelepkolu jî deklarasyona Abdullah Ocalan a di pêvajoya 2013-2015’an de ku digot; “Aştî ji şer zehmettir e lê aştiya her şerekî heye” bi bîr xist û axaftina xwe wiha qedand: “Birêz Ocalan niha jî ji bo çareseriyê banga berpirsyartiyê li hemû gelan dike. Birêz Ocalan dixwaze dewlet jidil be. Divê pratîka dewletê jî li gorî vê bangê be. Madem pêvajoyek dest pê kir, wê demê li gorî wê tevbigerin. Divê her kes xwe di pêvajoyê de bibîne. Ev pêvajo, encama têkoşîna gelê Kurd e. Lewma bi birêz Ocalan re rûniştin ser maseyê.”