AMED - Hevserokê DEM Partiyê Tûncer Bakirhan di Newroza Amedê de axivî polîtîkayên hikûmetê rexne kir û wiha got: “Hûn nikarin li hemberî herikîna avê avjeniyê bikin, siyaseta şaş nagihîne cihê rast.”

 

Hevserokê Giştî yê Partiya Wekhevî û Demokrasiyê ya Gelan (DEM Partî) Tûncer Bakirhan di Newroza Amedê de xîtabî sed hezaran kesî kir. Bakirhan wiha got,"Ez mêvanên me yên hêja ku li tevahiya Tirkiye û Rojhilata Navîn beşdarî Newroza Amedê bûne silav dikim û dibêjim hûn bi xêr hatine."

 

Bakirhan têkildarî mijarên rojevê wiha got: “Pûsûlaya Rojhilata Navîn îro di Newroza Amedê de lê dide. Îro ne tenê li Rojhilata Navîn, li hemû cîhanê çav li qad û Newroza Amedê ye. Ji ber ku Amed Newroz e, Newroz Amed e. Tu Newroz î. Em cejna Newrozê ya birêz Ocalan ê ku gelê Kurd veguherand gelê Newrozê, pîroz dikin. Newroz pîroz be birêz Ocalan.

 

EV BANG MÎLAD E

 

Ev bangawazî ji bo girêkên li Mezopotamya û Anatolyayê bên vekirin û banga ji nû ve destpêkirina dîrokê ye. Birêz Ocalan di meşa xwe ya çareseriya demokratîk de, ku di sala 1993'an de dest pê kir, di 27 'ê Sibatê de bi banga sedsalê gaveke herî dîrokî avêt. Ev bang îfadeya rastiya gel e ku bi dehan salan e li ber xwe dide û ji bo çareseriya demokratîk têdikoşe. Ev manîfestoya gelên Mezopotamya û Anatoliyê ya jiyana bi hev re ye. Cewhera Banga Aştî û Civaka Demokratîk konsensûsa demokratîk e. Ev bang mîladek e û xwediyê vê bangê hûn in, gelê me yê li Qada Amedê ye.

 

Me bi dayîna berdêlên mezin em gihandin serketineke bi rûmet. Em ji pirsgirêkeke dîrokî derbasî aştî û çareseriyeke dîrokî dibin. Tirk û Kurd di seranserê dîrokê de deriyên hevjiyanê ji hev re vekirine û qedera xwe kirine hevpar. Lê belê di sedsala dawî de hewl hat dayîn ev biratî bi dîwaran û cihêkariyê bê ceribandin. Mirovên ku hezar sal berê deriyên Anatolyayê vekirin, sedsal in li pişt derî hatine hiştin. Êdî dem hatiye ku dawî li vê dîroka cudaxwaz were anîn.

 

Em di paşeroja hevpar a Tirk û Kurdan de li çareseriyê digerin û biryardariya wan a avakirina siberoja bi hev re ye.

 

WERIN EM BI HEV RE LI VÊ RÊYÊ BIMEŞIN

 

Banga 27'ê Sibatê ya birêz Ocalan, ji bo Tirkiyeyeke ku ti gel li van xakan neyê hiştin û her kes lê wekhev û azad be, bangek e. Me destê xwe daye kesên ku destê xwe dirêjî aştiyê dikin û milê xwe jî daye kesên ku mil dane milê me û em ê vê yekê bidomînin. Birikandina dîrokî û feraseta hevpar a têkiliyên Tirk-Kurdan dikare hemû rê li ber siberojeke demokratîktir nîşanî me bide. Em ne ji derve li çareseriyekê digerin, lê belê di paşeroja hevpar a Tirk û Kurdan de û biryardariya wan a ji bo avakirina siberojê bi hev re ne. Bi pêçandina birînên berê bi hev re em dikarin pêşerojê bi hev re ava bikin. Werin em bi hev re di vê rêyê de bimeşin.

 

Biryara me, helwesta me zelal e. Em bi milyonan, aştiyê dixwazin, wekheviyê dixwazin, em civakeke demokratîk dixwazin. Binêrin bi milyonan mirov li qada Newroza Amedê aştî û çareseriya demokratîk dixwazin. Divê her kes peyama qadên Newrozê baş bixwîne. Meydanên Newrozê vexwendina peymana aştiyê ya sedsalê ye. Divê Tirkiye bi Kurdên li derveyî sînorê xwe dijîn re bibe xizmatî, ne dijmin.

 

DIJBERÎ BI TIRKIYEYÊ NADE QEZENCKIRIN 

 

Gelên Tirkiyeyê yên hêja; di hizûra milyonan de dibêjim ku Kurd, Ereb û Tirkmenên li derveyî sînorên Tirkiyeyê ne tenê cîranên me ne, di heman demê de xizm û gelê me ne. Têkiliyên xurt ên em bi van gelan re datînin, ne tenê ji bo aştiya Tirkiyeyê, ji bo aramiya tevahiya Rojhilata Navîn jiyanî ye. Dixwazim bi bîr bixim ku divê bi Kurdên derveyî sînorê Tirkiyeyê re ne dijminatî divê xizmatî were kirin. Dijberî dê bi Tirkiyeyê nede qezenckirin. Biratî û diyalog dê bi Tirkiyeyê mezin bide qezenckirin. Di demeke ku dê hevkêşeya Sûriyeyê jinûve were teşegirtin de divê bi Kurdan re diyalog were pêşxistin û ev yek dê sûdeke mezin bide Tirkiyeyê. Em ji bîr nekin ku Kurdên li derveyî sînorê Tirkiyeyê ne dijmin, ji bo aştiyê firsend in. Divê Tirkiye vê firsendê rast binirxîne û ev berpirsyartiya wan e. 

 

Gelên Tirkiyeyê yên hêja; demokrasî, hiqûq û aştî rêya mecbûrî ya xelasiyê ye. Wateya bêhnstandinê çi be, avakirina zemîna siyasî û hiqûqî jî ewqas jiyanî ye. Heke her du alî jî gavan biavêjin, dê civak ji pêvajoyê bawer bike. Bawerî, hêvanê pêkvjiyanê ye. Serkeftina vê pêvajoyê, girêdayî nûjenkirina têkiliyên Kurd-Tirkan a li ser bingeha wekhevî û demokratîk bibe. 

 

Têkildarî vê pêvajoyê em her tim ji aliyê erênî ve lê dinêrin. Em bang li îktîdar û dewletê dikin ku aliyê vala yê îskanê tije bikin. Aştî, ne meseleya têkçûn-têkbirinê ye. Aştî, bihara herî xweşik e ku hemû kes serdikeve. Em destûrê nedin ku ev bihar veguhere zivistanê. Em 85 milyon welatî xwedî li banga  Aştî û Civaka Demokratîk derkevin. 

 

ÎKTÎDAR BER BI TURBULANSÊ VE DIBE

 

Gelê me yê hêja; Rojhilata Navîn ketiye turbulanseke dijwar û ev bahoz bandorê li her kesî dike. Derdê me ew e ku em bi sax û silametî ji vê turbulansê derkevin. Lê belê îktîdar bi rêya qeyûman, bêdengkirina muxalefetê re rê li ber turbulanseke dijwartir vedike. Gavên ku ji rêgeha 27’ê Sibatê derdikeve diavêje. Em bang li îktîdarê dikin ku ji vê xeletiya xwe vegere. Bi ji hev cudakirina gelan re aştî û civaka demokratîk nabe. Bi binçavkirina Şaredarê ÎBB’ê û krîmînalîzekirina Lihevkirina Bajar re, bi qeyûman û êrişên ser Rojava re aştî û civaka demokratîk nabe. 

 

Gelên hêja yên Tirkiyeyê; nêzikatiya Tirkiyeyê ya înkarger, yekperest û dij-demokratîk a li dijî gelan, bû sedem ku Tirkiye sedsalan winda bike. Bi xwe re xizanî û birçîtî anî. Bi banga sedsalê re berê me dîsa zivirî pêşerojê û me saetên xwe li ber aştiyê girt. Nifteya ku dê deriyê aştiyê veke, çareseriya pirsgirêka Kurd û Tirkiyeya demokratîk e. Rêgeha çareseriya pirsgirêka Kurd jî Banga Sedsalê ya birêz Ocalan e. Nabe ku êdî çareseriya vê pirsgirêkê were taloqkirin. 

 

SIYASETA XELET ME BER BI CIHÊ RAST VE NABE 

 

Ji ber ku li herêmê em di nava senaryoya qiyametê de ne. Rêya xelasiya ji vê qiyametê jî tifaqa Kurd-Tirkan a li ser bingeha demokrasî û wekheviyê ye. Lewma em careke din dibêjin; siyaseta xelet me ber bi cihê rast ve nabe. Rêgeha me, dê me ber bi komareke demokratîk ve bibe. Heval û rêhevalên hêja; binêrin, hemû rêyên dizanin dê ber bi ku de biçin vekirî ne. Em rêya xwe dizanin. Nirx û evîna me ya aştiyê rêya me diyar kir. Rêya me, rêgeha me ber bi Komara Demokratîk ve diçe. Cewhera rêya me jî bi Banga 27’ê Sibatê xwe rave kir. Di siyasetê de em li cem edalet, demokrasî, wekhevî û nirxên azadiyê ne. Rêya me, Rêya Sêyemîn e ku ber bi demokrasî, wekhevî û azadiyê ve diçe. Bi ruhê Newrozê, bi baweriya Kawa û bi cisareta Mazlum em ê meşa xwe bidomînin. Dawiya vê rêyê jî aştî ye, demokrasî û azadî ye. Ev sed sal in ev xak bi hesreta aştiyê dijî. Niha dema bihîstina dengê wê aştiyê ye û dema qîrîna wî dengî ye. Dema wê hatiye ku em aştiya li asoyê xuya dike bînin van xakan.”