STENBOL - Dayikên Şemiyê vê hefteyê aqûbeta Talat Turkoglu pirsîn û bang li Serokkomar Erdogan hat kirin ku têkoşîna hiqûqî ya malbatên neyê astengkirin û berpirsyariya xwe bîne cih.
Dayikên Şemiyê ku her hefte li Qada Galatasarayê tên cem hev, vê hefteyê çalakiya xwe ya 1045'an li dar xistin. Dayikên Şemiyê bi qurnefîl û wêneyên xizmên xwe yên di binçavan de hatin windakirin hilgirtin û li Qada Galatasarayê hatin cem hev û aqûbeta Talat Turkoglu pirsîn. Seroka Komeleya Mafên Mirovan (ÎHD) Şaxa Stenbolê Gulseren Yolerî, xizmên windayan û gelek parêzvanên mafên mirovan beşdarî çalakiyê bûn. Metna daxuyaniyê ji aliyê Seroka Şaxa ÎHD'ê ya Stenbolê Gulseren Yolerî ve hat xwendin.
Gulseren Yolerî, anî ziman ku divê ev bêhiqûqiya li hemberî mafê civîn û xwepêşandanê bi dawî bibe û xwest dorpêçkirina li Galatasarayê bên bi dawîkirin. Gulseren Yolerî wiha berdewam kir: "Talat Turkogluy ê 45 salî ku wek sosyalîst tê naskirin li Avcilara Stenbolê dijiya. Di 29'ê Adara 1996'an da ji bo dîtina dayika xwe çûbû Edîrneyê. Ji birayên xwe re got ku polîsên sivîl ji Stenbolê heta li ber deriyê malê ew şopandine. Dema li Edirneyê dima ev rewşa şopandinê berdewam kiriye. Di 1'ê Nîsana 1996'an de, dema ku vegeriya mala xwe ya Stenbolê, êdî pêve jê agahî nehatiye girtin. Malbata Turkoglu serî li İHD'ê û Rêxistina Efû ya Navneteweyî dane. Lê tu encam negirtine. Rayedarên fermî diyar kirin ku Talat Turkoglu nehatiye binçavkirin û cihê wî nizanin.
Di sala 1997'an de Kasim Açik ê JÎTEM'ê di îtîrafên xwe yên di çapemeniyê de behsa Talat Turkoglu dike û dibêje 'Talat li Çadirkent a li nêzî Edîrneyê ji hêla polîs, leşker û îtîrafkaran îşkence lê hatiye kirin û hatiye kuştin û cenazeyê wî avêtine Çemê Merîçê."
Malbat pişt re bi rêya parêzeran serî li dozgeriyê dan. Lê dozgerî lêpirsîn nekir û biryara 'Hewcedarî bi lêpirsînê nîne' da."
Gulseren Yolerî bal kişand ser wê yekê ku Dadgeha Mafên Mirovan a Ewropayê (DMME) Tirkiye bi hinceta ku lêpirsîneke bi bandor nekiriye û erka xwe ya ji bo parastina mafê jiyanê ya Talat Turkoglu pêk neaniye, mehkûm kir û got: "Piştî biryara DMME’yê ji Dozgeriya Edîrneyê xwest ku lêpirsînê kûr bike û bidomîne, lê dîsa biryara 'Hewcedarî bi lêpirsînê nîne' hat dayîn.
Em bang li Serokomar Erdogan dikin: Xizmên windayan pirsa 'Çi hat serê hezkiriyên me yên hatin binçavkirin?' Çiqas sal jî derbas bibin, em ê ji bo Talat Turkoglu hemû windahiyên xwe edaletê bixwazin û bi bîr bînin. Divê dewlet li gorî pîvanên hiqûqa gerdûnî tevbigere.”
Piştî daxuyaniyê xwişka Talat Turkoglu ya mezin Mûnûbe Turkoglu axaftinek kurt kir û diyar kir ku bi rêyên hiqûqî nikarin tu bersivê wergirin. Munube Turkoglu wiha dirêjî da axaftina xwe: "Em naxwazin li qadê bi 10 kes bi sînor bin. Çima rayedar ji fikir û hestên me aciz dibin? Em edaletê dixwazin, dixwazin ku kiryar bên darizandin."
Çalakî bi dayîna qurnefîlan li qada dorpêçkirî bi dawî bû.