STENBOL - Hevserokê Giştî yê OHD'ê Serhat Çakmak got: "Divê gav bên avêtin da ku bawerî çêbibe û entegrasyona demokratîk pêşve biçe. Divê şert û mercên xebatê yên birêz Ocalan demildest werin sererastkirin da ku li gorî ruhê pêvajoyê û rol û mîsyona wî be."

 

Di çarçoveya Pêvajoya Aştî û Civaka Demokratîk de ku ji hêla Rêberê Gelê Kurd Abdullah Ocalan ve hat destpêkirin, PKK pêşî biryar da ku xwe fesix bike û çekê deyne. Piştre Koma Aştî û Civaka Demokratîk merasîmeke sembolîk a şewitandina çekan li dar xist. Di 26'ê Cotmehê de, Tevgera Azadiyê ya Kurd bi daxuyaniyekê ragihand ku wê biryar daye ku "hêzên xwe bikişîne Herêmên Parastina Medyayê." Daxuyaniya ku bi gerîlayên ku vekişiyane Herêmên Parastina Medyayê hat dayîn, destnîşanî pêwîstiya avakirina "qanûnek veguhêz" kir da ku pêvajo bigihîje armancên xwe.

 

Hevserokê Giştî yê Komeleya Hiqûqnasên Ji Bo Azadiyê (OHD) Serhat Çakmak pêvajoya ku dewlet û desthilat hîn gavên berbiçav neavêtine û daxwaza Tevgera Azadiyê ya Kurd a ji bo "qanûnek veguhêz" a ku ligel "vekişînê" tekez kiriye, nirxand û got ku daxuyaniya vekişînê "nîşan dide ku pêvajo ji bo her du aliyan jî berdewam dike." 

 

Çakmak ku got "Ger bi îradeyek hevpar berdewam nekira, tu alî jî hewce nedikir ku gavek din bavêje", wiha domand: "Di vî warî de, cihê kêfxweşiyê ye ku hîn jî ji her du aliyan ve îradeyek ji bo çareseriyê heye ku dê hêviyên mirovên ku bi salan e li vî welatî aştiyê hêvî dikin bicîh bîne. Heke hûn bi bîr bînin, di navbera salên 2013 û 2015'an de, aliyên di Pêvajoya Aştiyê de gavên wisa yên guncav ji bo pêvajoyê neavêtin. Daxuyaniya duh divê bi rastî wekî gavek ji hêla PKK'ê ve were şîrovekirin da ku atmosfera bêpevçûniyê ji bo qonaxa duyemîn a pêvajoyê, qonaxa danûstandinan, bêtir xurt bike. Di vê çarçoveyê de, ew di heman demê de gavek bû ku ji bo kêmkirina îhtîmala sabotaj an kuştinê jî hat avêtin. Ev gav pabendbûna wê ya bingehîn a bi pêvajoyê re û pabendbûna wê ya bi pêkanîna wê re nîşan dide." 

 

'QONAXA DUYEM: DANÛSTANDIN'

 

Çakmak girîngî û nirxê her gaveke ku dê xizmeta aştiyê bike û hawîrdorek bêpevçûn biafirîne, destnîşan kir û got: "Divê gaveke ku hatiye avêtin wekî pêwîstiyek ji banga ku di 27'ê Sibatê de hatiye kirin were dîtin. Niha, heke em pêvajoya ku em tê de ne ji perspektîfa ezmûnên çareserkirina nakokiyên cîhanî binirxînin, divê were zanîn ku em niha di qonaxa duyemîn a pêvajoyê de ne, ango di pêvajoya danûstandinan de ne. Em di gotina ku hemû şert û mercên danûstandinê niha hene de tu zirarê nabînin."

 

Çakmak anî ziman ku divê niha gavên berbiçav werin avêtin. 

 

Çakmak bal kişand ser girîngiya entegrasyona demokratîk di vê pêvajoyê de û got: "Di warê entegrasyona demokratîk de, em bi heyameke veguhêz re rû bi rû ne, anku rêxistineke ku xwe fesix kiriye. Ji bo milîtanên rêxistinê, divê li ser rêziknameyên qanûnî yên ku rê li ber vegera wan a welêt vekin, xebat were kirin. Divê em der barê rapor û pêşniyazên qanûnî yên ku komîsyona ku li meclisê hatiye damezrandin de, êdî xebata xwe ya li ser vê mijarê biqedîne û pêşkêşî komîsyonên têkildar bike, çalakiyên berbiçav bibînin."

 

Çakmak diyar kir ku entegrasyon û bawerî gavên navîn û demdirêj in û got: "Ji mafê perwerdehiya bi zimanê dayikê bigire heya bikaranîna zimanê dayikê li qadên giştî; ji xurtkirina rêveberiyên herêmî bigire heya rakirina astengiyên burokratîk û qanûnî yên ji bo bikaranîna mafên demokratîk. Rewşa birêz Ocalan jî li vir girîng e. Divê şert û mercên xebata birêz Ocalan demildest were sererastkirin da ku bi ruhê pêvajoyê û rol û mîsyona wî re lihevhatî be."

 

MA / Omer Îbrahîmoglû