WAN - Rêxistinên girseyî yên demokratîk ji bo girtiyê nexweş Abdurrahman Gemîcîoglû ku di beşa venêrîna awarte de destkelemçekirî tê dermankirin, bang kirin û xwestin bê berdan.
Cezayê 8 sal û 9 mehan ê hefsê yê Abdurrahman Gemîcîoglû ê 67 salî ji hêla Dadgeha Bilind ve hatibû erêkirin. Gemîcîoglû, di 3’yê cotmehê de hate girtin û şandin Girtîgeha bi Ewlekariya Bilind a Wanê. Gemîcîoglû nexweşê penceşêra rûviya stûr e û her wiha nexweşiyên wî yên weke prostat û dil hene. Gemîcîoglû ji roja hatiye girtin heta niha hema hema her roj sewqî nexweşxaneyê tê kirin.
Rewşa Gemîcîoglû di şeva 25’ê cotmehê de aloz bû û rakirin Nexweşxaneya Perwerde û Lêkolînê ya Fakûlteya Tipê ya Zanîngeha Yuzuncu Yilê ya Wanê. Tedawiya Gemîcîoglû ya li beşa lênihêrîna awarte ev 6 roj didomin. 17 rêxistinên civaka sivîl ên li bajar ji bo berdana Gemîcîoglû daxuyaniyeke hevpar dan.
BANGA HESTIYARIYÊ LI RAYA GIŞTÎ KIRIN
Hevseroka Şaxa Komeleya Hiqûqnasên ji bo Azadiyê (OHD) ya Wanê Mehtap Işik di daxuyaniyê de ev tişt anî ziman: “Abdurrahman Gemîcîoglû di kategoriya girtiyên nexweşiya wan giran de ye. Ji ber ku li girtîgehê mercên tedawîkirinê tune ne, li beşa lênihêrîna awarte tê ragirtin. Ev yek binpêkirina mafên mirov û tenduristiyê ne. Divê girtiyên nexweş ên di vê rewşê de li derve bên tedawîkirin. Di vê çarçoveyê de em banga hestiyariyê li her kesî dikin. Ji bo Gemîcîoglû li derve û di mercên bi tendurist de tedawî bibe werin deng bidin me.”
‘EM NAXWAZIN CENAZEYÊ WÎ JI GIRTÎGEHÊ DERKEVE’
Hevserokê Şaxa Komeleya Mafên Mirovan (ÎHD) a Wanê Mehmet Salih Coşkun jî wiha got: “Ji ber nexweşiyên giran divê tavilê were berdan. Nexweşê rûviya stûr e û gelek nexweşiyên wî yên kronîk hene. Ji ber nexweşiyên xwe nikare di girtîgehê de bimîne. Mercên girtîgehê dikin ku nexweşiyên wî girantir bibin. Banga me ji bo hemû sazî û dezgehên têkildar e; ji bo Wezareta Dadê û serdozgeriyên komarê ye; bila girtî Gemîcîoglû ji ber nexweşxaneyên xwe yên giran were berdan û înfaza wî were taloqkirin. Em naxwazin cenazeyê Gemîcîoglû û girtiyên din ên nexweş ji girtîgehê derkevin.”
‘EM PÊVAJOYÊ DIŞOPÎNIN’
Endamê Komîsyona Mafên Mirovan a Odeya Bijîşkan a Wan-Colemêrgê Huseyîn Yavîç jî diyar kir ku dozgerî nahêle ew bi Abdurrahman Gemîcîoglû re hevdîtinê bikin û wiha pê de çû: “Gemîcîoglû tenê yek ji sedan girtiyên nexweş e ku li girtîgehê terkî mirinê hatiye kirin. Gemîcîoglû li hemberî nexweşiyên giran li ber xwe dide. Dema hatî girtin sewqî nexweşxaneyê hate kirin lê ji ber mercên nexweşxaneyê rê nedidan, ji neçarî di dawiya hefteyê de vedigere girtîgehê. Weke saziyan me ev pêvajo şopand û me dît ku binpêkirinên pir cidî hene. Di halê hazir de heta niha tu pêşketin tune ne. Divê tavilê cezayê Gemîcîoglû bê taloqkirin. Nikare bi tena serê xwe li wir bijî. Heta lênihêrîna wî ya li cem malbatê jî zehmet e. Divê ev pêvajo bilez pêş bikeve. Di navbera nexweşxane û girtîgehê de tê û diçe.”
‘BI DESTKELEMÇEKIRÎ TÊ TEDAWÎKIRIN’
Yavîç, da zanîn ku Gemîcîoglû bi destkelemçekirî li nexweşxaneyê tê ragirtin û axaftina xwe wiha qedand: “Ev rewş li Tirkiyeyê êdî veguheriye trajediyekê. Di salên dawî de bi sedan girtiyên nexweş van pêvajoyan dijîn. Gelek girtiyên nexweş di şert û mercên nebitendurist ên girtîgehan de jiyana xwe ji dest dan. Xebata têkildarî girtiyên nexweş nehat domandin. Ji bo li girtîgehan êdî bûyerên mirinê çênebin, em ê pêvajoyê bişopînin. Divê beriya her kesî Wezareta Dadê û îktîdar ji bo pêşîlêgirtina ‘Mafê jiyanê’ tevdîrên pêwîst bigirin. Banga me ji bo hemû saziyan ew e ku ji bo taloqkirina înfaza Gemîcîoglû bihestiyar tevbigerin.”
Saziyên metn îmze kirin ev in: “TUHAY-DER, MEBYA-DER, TJA, Şaxa ÎHD’a Wanê, Şaxa OHD’ê, Nûnertiya THÎV’ê, Odeya Bijîşkan a Colemêrg-Wanê, Şaxa Wanê ya Platformên Şaxan a KESK’ê, Komîsyona Girtîgehan a Baroya Wanê, DÎSK Emeklî-Sen, Kûrdîgeh, Aryen Huner, Komeleya Medya û Hiqûqê, Komeleya Jinan a Starê, TMMOB û DÎSK Genel-Îş.”