NAVENDA NÛÇEYAN - Di çalakiyên ji bo aqûbeta windayan hatin lidarxistin de hat diyarkirin ku ji ber neçareserkirina pirsgirêka kurd windakirinên di binçavan de û cînayetên faîl nediyar pêk hatin û daxwaza edaletê hat kirin.
Xizmên Windayan û rêveberên şaxên Komeleya Mafên Mirovan (ÎHD) ên Amed, Êlih û Colemêrgê vê hefteyê jî ji bo aqûbeta windayan çalakî li dar xistin û daxwaza edaletê hat kirin.
AMED
Xizmên Windayan û ÎHD’a Amedê di hefteya 822’yemîn de çalakiya “Bila winda bên dîtin, faîl bên darizandin” li ber Bîrdariya Mafên Mirovan a li Parka Koşûyolû li dar xistin. Gelek kes tev li çalakiyê bûn û wêneyên windayan hatin hildan. Vê hefteyê li aqûbeta Alî T ekdag ê di 13’ê mijdara 1994’an de li Qada Deriyê Çiyê ya Amedê hat binçavkirin û carek din agahî jê nehat girtin, hat pirsîn.
Serokê ÎHD’a Amedê Ercan Yilmaz ewilî di çalakiyê de axivî û bal kişand ser neçareserkirina pirsgirêka kurd û got: “Ji ber ku meseleya kurd nayê çareserkirin bedelên pirr zêde hatin dayîn. Yek ji van bedelan jî windakirina di binçavan de û cînayetên faî ne diyar bûn. Çend roj berê dîsa em tayînkirina qeyûman ji xewê şiyar bûn. Îradeya gelê kurd tune tê hesibandin. Xelk qeyûman protesto dike lê bi awayek hişk û tund mudaxile li welatiyan tê kirin. Em wek ÎHD û xizmên windayan li dijî pêkanîna qeyûman in û dibêjin qeyûman bi paş ve bikişînin.”
Xwişka Alî Tekdag, Îffet Mutaş da zanîn ku birayê wê gelek caran hatiye îşkencekirin û herî dawî wî windakirin û got: “Ez heqê xwe li dewletê helal nakim. Em cenazeyên xwe dixwazin. Dayik û bavê min bi hesreta dîtina birayê min koç kirin. Em ê van kirinan ji bîr nekin. Heta ez sax bim wê destê min di stûyê dewletê de be. Alî û şehîdên din çi ji we kiribûn. Ew şehîdên me ne.”
Endama Komîsyona Windayan a ÎHD’a Amedê parêzer Berfîn Elçî serpêhatiya windakirina Alî Tekdag xwend.
Piştî daxuyaniyê ji bo Tekdag û hemû windayan çalakiya rûniştinê hat lidarxistin.
ÊLIH
Xizm^ne Windayan û rêveberên ÎHD’a Êlihê di hefteya 658’emîn de li ber avahiya komeleyê çalakî li dar xistin û wêneyên windayan hildan. Di çalakiya vê hefteyê de li faîlên Davût Altunkaynak ê 13 salî û Nedîm Akyon ê 16 salî di binçavan de hatin windakirin, hat pirsîn.
Rêveberê ÎHD’a Êlihê Reşît Çetînkaya daxuyanî xwend û bi bîr xist ku Davut Altunkaynak û Nedîm Akyon li navçeya Kerborana Mêrdînê hatin windakirin û piştî 21 salan hestiyên wan hatin dîtin. Çetînkaya anî ziman ku berpirsiyarên hemû cînayetên ku nehatine tespîtkirin dewlet e.
Piştî daxuyaniyê ji bo bîranîna windayan çalakiya rûniştinê hat lidarxistin.
COLEMÊRG
Xizmên Windayan û Şaxa ÎHD’a Colemêrgê jî di hefteya 148’emîn de çalakiya heftane li dar xistin. Çalakî li Kuçeya Hunerê pêk hat û wêneyên windayan hat hildan. Di çalakiya vê hefteyê de hat xwestin ku faîlên Hamza Tutan ê di 8’ê cotmeha 1985’an de li Şemzînanê di binçavan de hat qetilkirin, bên darizandin.
Endamê ÎHD’a Colemêrgê parêzer Eren Baskin metna daxuyaniyê xwend û xwest ku kujerên Hamza Tutan bên dîtin û darizandin.
Piştî daxuyaniyê çalakiya rûniştinê hat lidarxistin.
ÎZMÎR
Şaxa ÎHD’a Îzmîrê jî çalakiya “Bila winda bên dîtin, faîl bên darizandin” ji du hefteyan carekê pêk tîne, li ber Sumerbanka berê ya li navçeya Konakê li dar xist. Gelek kes tev li çalakiyê bûn û pankart vekirin. Di çalakiya vê hefteyê de li aqûbeta Huseyîn Toraman ê di 27’ê cotmeha 1991’an de li Stenbolê hat binçavkirin û carek din agahî jê nehat girtin, hat pirsîn.
Rêvebera ÎHD’a ÎzmîrêGulay Gun Bîlîcî daxuyanî xwend û bi bîr xist ku Huseyîn Toraman li ber deriyê xew ji polîsan ve bi darê zorê li Torosa Spî hatiye siwarkirin û wî revandine û piştre heta îro tu agahî jê nehatiye girtin.