ÎZMÎR - Komeleya Lêkolînên Çand û Ziman Avesta bertek nîşanî mohrkirina avahiyê da û diyar kir ku zimanê dayikê xeta wan a sor e û dê li zimanê xwe xwedî derkevin.
Komek endam û rêveberên Komeleya Lêkolînên Çand û Ziman Avesta li pêş avahiya xwe kom bûn û daxuyanî dan. Hevserokê Komeleya Lêkolînên Çand û Ziman Avesta Ramazan Kaygisiz, anî ziman ku Komeleya wan di sala 2018an li Îzmîrê hate avakirin û bi awayekî yasayî û şefaf lêkolînên li ser Kurdî dike û perwerdehiya zimanê Kurdî dide û wiha got: ”
Di vê serdema ku proseya diyalog û aşitiyê birêve diçe û hêviyên aşitiyê zêde bûne de, mixabin komeleya me rastî gefên neyasayî û bêbingeh tê. Du rojan beriya niha, zabitayan bi hênceta ku “rûxsata komeleyê tune ye” gefên girtin û mohrkirinê li me xwarin û ji aliyê zabitayên Şaredariya Konakê ve di 1ê Tebaxê deriyê Komeleya me mohr kirin.”
Ramazan Kaygisiz, da zanîn ku bi fermana walîtiyê komeleya wan hatiye mohrkirin û got: “Em bi awayekî eşkere diyar dikin ku heta niha bi sedan xwendekaran ji dersên me yên zimanê Kurdî sûd wergirtine. Xebatên me hem bi awayekî rûbirû û hem jî online berdewam dikin. Em ji rayedarên dixwazin ku hurmetê nîşanî zagonan bidin. Li gorî qanûn û yasayên navdewletî tevbigerin. Mafê perwerdehiya zimanê dayikê mafekî bingehîn e. Gef û tundiyên li dijî komeleyên çandî divê bêne rawestandin. Ji bo pêşveçûna civakê divê azadiya çandî bê parastin.”
Ramazan Kaygisiz, bang li hemû welatiyên demokrat, rêxistinên mafên mirovan, çapemenî û tevgerên sivîl jî kir û wiha bi dawî kir: “Li dijî van gefên neyasayî dengê xwe bilind bikin.
Piştgirê bidin komeleyên çandî. Ji bo parastina mafê perwerdehiya zimanê zimanê zikmakî bi me re di nav hevkariyê de bin. Komeleya Çand û Ziman Avesta, dê li ser riya xwe ya yasayî berdewam bike û tu carî ji xebatên xwe yên çandî û perwerdehiyê venagere. Em hêvî dikin ku rayedar di vê xeletiyê israr nekin û hêzên fermî bi rêya diyalog û hevkariyê pirsgirêkan çareser bikin.”
Ramazan Kaygisiz herî dawî xwest piştgirî û parastina zimanê Kurdî bikin û got: “Ev piştgirî erkekî mirovî û çandî ye. Em wek Komeleya Lêkolînên Çand û Ziman Avesta, zimanê Kurdî wek xeta xwe ya sor dibînin û ji bo parastina wê em ê her di nav hewldanê de bin. Zimanê zikmakî yek ji bingehên nasnameya me ye û em ê heta Kurdî bibe xwedî statuyeke fermî li ser vê rêya pak bimînin. Em bang li hemû aliyên têkildar dikin ku li gorî prensîbên wekhevî, dadwerî û azadiyê tevbigerin. Bijî Zimanê Kurdî, Bijî Aşitî û Azadî!”