STENBOL/ ENQERE- Di çalakiyên li Stenbol û Enqereyê de, rewşa girtiyên nexweş Tenzile Acar û Emin Aladag hat destnîşankirin û daxwaza berdana wan hat kirin.

 

Komîsyona Girtîgehan a Şaxa Komeleya Mafên Mirovan (ÎHD) a Stenbolê, 701'emîn çalakiya "Rûniştina F" li ber navenda komeleyê ya li Beyoglûyê li dar xist. Vê hefteyê, di çalakiyê de rewşa tenduristiyê ya girtiya nexweş Tenzile Acarê ku li Girtîgeha Jinan a Girtî ya Bakirkoyê tê girtin, hat destnîşankirin. Di daxuyaniyê de pankartên bi nivîsa "Dermankirin mafek e, nayê astemgkirin" û "Girtiyên jin ên nexweş berdin" hatin hilgirtin û her wiha gelek caran dirûşmeyên "Bila girtiyên nexweş bên berdan" û "Bila Tenzile Acar bê berdan" hatin berzkirin.

 

Endama Komîsyona Girtîgehê ya Şaxa ÎHD'ê ya Stenbolê Mukadder Şamiloglûyê, di çalakiyê de daxuyaniya çapemeniyê xwend.

 

Mukadder Şamiloglûyê diyar kir ku bi Tenzile Acarê nexweşiya Hepatît B ya kronîk û nexweşiya tuberkulozê ya giran heye û ev nexweşî dibin sedema pirsgirêkên wekî zehmetiya nefesgirtinê, westandina zêde, lawaziya zêde û xwînrijandina ji qirikê û got: "Her çend ew hewce dike ku di bin çavdêriya bijîşkî ya birêkûpêk de ê dermankirin de be, ji ber nexweşiyên xwe parêzek taybetî hebe û di hawîrdorek paqij û hewadar de bijî jî, şert û mercên girtîgehê rê nadin vê yekê û ev yek gefê li jiyana Tenzile Acarê dixwe."

 

Dêya Tenzîel Acarê, Resmiye Acarê jî bilêv kir ku ew ji ber jiyana keça xwe bi fikar in û got: "Êdî em li benda xebereke xêrê ne. Tu dayik naxwaze darbesta zaroka xwe teslîm bigire." 

 

Mukadder Şamîloglûyê jî bilêv kir ku di 26'ê Tebaxê de hevdîtin bi Tenzîle Acarê re kiriye û got ku di hevdîtinê de Tenzîle Acarê jê re gotiye muayeneya bikelemçe lê hatiye ferzkirin û mafê wê yê tenduristiyê hatiye binpêkirin.

 

Mukadder Şamîloglûyê destnîşan kir ku dê têkoşîna wan a ji bo girtiyên nexweş bidome û xwest ku înfaza Tenzîle Acarê bê taloqkirin û demildest dest bi dermankirina wê bê kirin. 

 

Piştî daxuyaniyê çalakî bi berzkirina dirûşmeyan bi dawî bû.

 

ENQERE

 

Înîsiyatîfa Azadî ji bo Girtiyên Nexweş di hefteya 573'emîn a çalakiya xwe de li Kolana Sakarya kom bû. Vê hefteyê, rewşa girtiyê nexweş Emin Aladag ku 27 sal in li Girtîgeha Girtî ya Ewlekariya Bilind a Hejmar 1 a Xarpêtê tê girtin, hat destnîşankirin. Rêveberê Şaxa Komeleya Mafên Mirovan (ÎHD) a EnqereyêAtilla Dirim,, diyar kir ku Aladag nikare jiyana xwe bidomîne û divê tavilê were berdan.

 

Dîrîm li ser rewşa Aladag wiha axivî: "Ji ber îşkenceya ku di sala 1993'yan de dema ku hat girtin, Aladag ji destê xwe yê rast û lingê xwe yê çepê nerihet bûye. Di sala 1998'an de hat berdan û piştî ku cezayê wî hat erêkirin, di sala 2000'î de li Wanê hat girtin. Di dema girtîgehê de, emeliyatên wî bi derengî hatin xistin û dermankirina wî bi dermanên êşbirrê hatiye paşxistin. Serlêdanên parêzerên wî ji bo dermankirina li derveyî girtîgehê hatin redkirin û ev rewşa wî girantir kir. Girtiyê ku di sala 1968'an de ji dayik bûye, 27 sal in di girtîgehê de ye. Du sal in nexweşiya Parkinsonê pê re heye. Tansiyona zêde û şekirê kronîk pê re heye. Her wiha nexweşiya KOAH û astimê jî pê re hene. Rewşa wî xirabtir bûye û ji bo domandina jiyana xwe ya rojane pêdiviya wî bi alîkariyê heye."