NAVENDA NÛÇEYAN - Fermandariya Giştî ya Hêzên Ewlekariya Hundirîn ji bo ewlehî û îstîqrara li Reqayê operasyoneke nû da destpêkirin. 

 

Fermandariya Giştî ya Hêzên Ewlekariya Hundirîn a Bakur û Rojhilatê Sûriyeyê bi daxuyaniyekê ragihand ku hêzên wan pêngava ewlehiyê li Reqayê daye destpêkirin. Fermandariyê aşkera kir ku ew ê li seranserî deverên Herêma Bakur û Rojhilatê Sûriyeyê pêngavên ewlehiyê yên berfireh bidin destpêkirin û di çend rojên bê de mizgîniyek baş bidin.

 

Fermandariyê, diyar kir ku di encama salên dirêj ên şerê li Sûriyeyê de, kaos û bêîstîqrarî li seranserî welêt belav bûye û li gelek herêman valahiyek ewlehiyê çêkiriye. Fermandariyê, destnîşan kir ku vê yekê bandoreke neyînî li herêmên Bakur û Rojhilatê Sûriyeyê jî kiriye.

 

LIV Û TEVGERA DAIŞ’Ê GAVEKÎ WIHA PÊWÎST KIR 

 

Bi domdarî fermandariyê got: “Ev rewşa xirab rê daye şaneyên terorîst ên DAIŞ’ê ku çalakiyên xwe bi awayekî mezin vegerîne û xwe birêxistin bike û bendên hêzên me û Hêzên Sûriya Demokratîk (HSD) li gelek bajar û bajarokan armanc bikin. Her wiha rê li ber bazirganên hişbirê yên ku di bin parastina rejîma berê ya Sûriyeyê de dixebitîn vekir da ku bazirganiya xwe berfireh bikin û bigihêjin herêmên me yên Bakur û Rojhilatê Sûriyeyê. Girêdayî vê yekê, bûyerên takekesî yên kesên giyan xerab hene ku guleyên bêserûber diavêjin. Vê yekê rewşeke bêistiqrarî û neewlehiya welatiyan çêkiriye. Van kiryaran teşwîqek mezin di nava hêzên me de çêkir ku dest bi pêngavên ewlehî û leşkerî, zêdekirina ewlehiyê û bilindkirina amadekirinê bikin. Hêzên me mîna van pêngavan li gelek deveran da destpêkirin; ji wan pêngava paqijkirina başûrê Hesekê ye. Di wê pêngavê de gelek endamên vê şaneyên terorîst ên DAIŞ´ê hatin girtin, çek û cebilxane desteser kirin.

 

LI KAMPA HOLÊ 11 DAIŞ’Î HATIN GIRTIN

 

Piştre hêzên me amadekariyên pêngava ewlehiyê ya berfireh li kampa Holê ku wekî kampa herî xeternak a li ser rûyê erdê ye ku malbatên endamên DAIŞ’ê yên niha girtî ne, kirin. Hêzên me, Hêzên Ewlekariya Hundirîn a Jin û Yekîneyên Parastina Jin (YPJ) bi piştgirîya Hêzên Sûriya Demokratîk û Koalîsyona Navneteweyî tev li pêngavê bûn. Pêngavê du rojan dewam kir, tê de 11 endamên girêdayî vê rêxistina terorîst hatin girtin, her wekî din gelek şebeke û êriş dihatin amadekirin da ku êrişî herêmên me bikin, hatin bêbandorkirin.

 

OPERASYONA EWLEHIYÊ HAT RAGIHANDIN

 

Îro, em wek Fermandariya Giştî ya Hêzên Ewlekariya Hundirîn a Bakur û Rojhilatê Sûriyeyê destpêkirina pêngaveke nû li bajarê Reqayê radigihînin. Armanca vê pêngavê tesbîtkirina ewlehiyê û kesên sûcdar ên ku gelek tawan kirine radestî edaletê bikin. Ev operasyon dê bidiqet û profesiyoneleke mezin ji aliyê Hêzên me yên taybet H.A.T û operasyonan were lidarxistin.

 

BANGA JI BO GEL

 

Em ji gelê xwe yê li Herêma Bakur û Rojhilatê Sûriyeyê re diyar dikin ku bi jiyana aştiyane û bi bîrdozî û nêzîkatiya neteweyeke demokratîk tê naskirin, piştrast dikin ku çawa me li Reqa, Dêrazorê û gelek deverên din bi fedakarî, mêrxasî û cesareteke mezin pişta rêxistina terorîst DAIŞ şikand, em ê li seranserî herêmên Bakur û Rojhilatê Sûriyeyê jî pêngavên ewlehiyê yên berfireh bidin destpêkirin. Em ê bi hemû hêza xwe li dijî terorê şer bikin û di rojên pêş de mizgîniyê bidin gelê xwe. Her wiha em aşkera dikin ku em ê heta serkeftinê rêya şehîdan bişopînin."